ᒪᐃ 31, 2012 - ᑲᓇᐃᑎᐊᓐ ᓄᐊᑦ ᐊᒻᒪ ᐅᐃᔅᔨᐊᑦᑯᑦ ᐊᖏᖃᑎᒌᒍᒻᒥᓐ ᐊᑎᓕᐅᖃᑎᒌᒃᑐᑦ

ᑲᓇᐃᑎᐊᓐ ᓄᐊᑦ ᐊᒻᒪ ᐅᐃᔅᔨᐊᑦᑯᑦ ᐊᖏᖃᑎᒌᒍᒻᒥᓐ ᐊᑎᓕᐅᖃᑎᒌᓚᐅᕐᑐᑦ
ᖃᖓᑕᕙᑦᑐᑦ ᑲᓲᑎᔪᓐᓇᕐᓯᖁᓪᓗᒋᓐ ᐊᑲᕐᕆᔮᒃᑲᓐᓂᖁᓪᓗᒋᑦ ᑐᕌᖏᓐᓇᕐᓗᑎᓐ

ᔭᓗᓇᐃᕝ ᒪᐃ 31, 2012

ᑲᓇᐃᑎᐊᓐ ᓄᐊᑦᑯᑦ ᐅᐱᒍᓱᒻᒪᕆᒃᐳᑦ ᑐᓴᕐᑎᑦᓯᔭᕆᐊᑦᓴᖅ ᐅᐃᔅᔨᐊᑯᓐᓂᖕ ᑲᓲᑎᓂᖕᒧᑦ ᐊᖏᕈᒻᒥᑦ ᐊᑎᓕᐅᖃᑎᖃᓚᐅᕋᒥᖕ ᖃᖓᑕᕙᑦᑐᓐ ᑐᕋᐃᓐᓇᕈᓐᓇᕐᓯᖁᓪᓗᒋᑦ ᐊᐅᓪᓚᕐᕕᒥᓄᑦ, ᐱᒋᐊᕐᕕᖃᕐᑐᓂ ᒪᐃ 24, 2012. ᐊᖏᖃᑎᒌᒍᓐ ᐱᕕᖃᕐᑎᑦᓯᓕᕐᐳᖅ ᐊᑲᕐᕆᔮᒃᑲᓐᓂᕈᑎᑦᓴᒥᖕ ᑕᒪᒃᑮᓐᓄᓐ ᐃᑭᔪᓐᓇᖁᓪᓗᒋᑦ ᖃᖓᑕᕙᑦᑐᑦ ᐊᑕᐅᓯᕐᖕᒥᑦ ᐃᑭᔪᓐᓇᐅᑎᖃᕋᓗᐊᕐᓗᑎᖕ, ᐃᑭᔭᕐᑐᓕᕈᓂ ᐊᑎᓕᔭᐅᑲᐅᑎᒋᔪᓐᓇᕐᓯᔪᖅ ᐃᑦᓯᕙᐅᑕᑦᓴᒥᓂᖕ ᑲᓇᐃᑎᐊᓐ ᓄᐊᑦᑯᑎᒍᑦ ᐊᒻᒪ ᐅᐃᔅᔨᐊᑦᑯᑎᒍᑦ, ᐃᑦᑎᕐᕕᖏᓪᓗ ᐃᑭᔭᐅᖁᔭᖏᑦ ᑐᕌᕐᕕᒻᒥᓄᑦ ᑐᕋᐃᓐᓇᕈᓐᓇᕐᓯᓪᓗᑎᖕ ᐊᐅᓪᓚᕐᕕᒥᓄᓐ.

“ᖁᕕᐊᓱᓪᓚᕆᑦᑐᒍᑦ ᐃᓚᓯᔪᓐᓇᕐᓯᒻᒥᒐᑦᑕ ᐊᑲᕐᕆᔮᒃᑲᓐᓂᕈᑎᑦᓴᒥᖕ ᖃᖓᑕᔨᒋᕙᑦᑕᑎᓐᓄᓐ ᐅᐱᒋᒻᒪᕆᑦᑐᒍᓗ ᓯᕗᓪᓕᖅᐸᐅᓪᓗᑕ ᑲᓇᑕᒥ ᐊᖏᕈᑎᒃᑯᑦ ᑲᓲᑎᔪᓐᓇᕐᓯᒐᑦᑕ ᐅᐃᔅᔨᐊᑦᑯᓐᓄᓐ,” ᐅᖃᓚᐅᕐᑐᖕ ᑲᓇᐃᑎᐊᓐ ᓄᐊᑦᑯᑦ ᐊᖏᔪᖅᑳᖓᑕ ᑐᖏᓕᐊ ᐃᓂᑦᓴᓕᐅᕆᔩᑦ ᐱᔨᑦᓯᕐᑎᖏᓐᓄᑦ, ᓗᕋᐃᓐ ᐹᓄᕐ. “ᖃᖓᑕᔪᖁᑎᒋᕙᑦᑕᕗᑦ ᐊᑲᕐᕆᔮᒃᑲᓐᓂᕐᓂᐊᓕᕐᖓᑕ ᑐᕋᐃᓐᓇᕈᓐᓇᕐᓯᓪᓗᑎᖕ ᐊᐅᓪᓚᕐᕕᒥᓄᓐ ᐃᓂᑦᓴᓕᐅᕐᕕᒻᒥᓂᖕ ᐃᑭᔪᓐᓇᐅᑎᑖᖓ ᑕᒪᒃᑮᓐᓄᑦ ᐃᑭᔪᓐᓇᐅᑎᑖᕆᓗᓂᐅᖕ, ᑕᕝᕙᑦᓴᐃᓐᓇᕐᓗ ᐃᑦᑎᕐᕕᖏᑦ ᐃᑭᕕᒥᓂᖕ ᐃᑭᔭᐅᒍᑎᖕ ᑐᕋᐃᓐᓇᕈᓐᓇᕐᓯᓪᓗᑎᖕ ᐊᐅᓪᓚᕐᕕᒥᓄᑦ.”

ᑲᓇᐃᑎᐊᓐ ᓄᐊᑦ ᖃᖓᑕᕙᑦᑐᑦ ᓄᓇᑦᓯᐊᖕᒧᓐ ᓄᓇᕗᒧᓪᓗ ᐅᑎᕐᔭᕐᑐᑎᖕ ᐊᖅᑯᓵᕐᐸᑦᑐᑎᓪᓗ ᖃᓪᓗᓈᓂ ᐊᖅᑯᓵᕐᕕᑎᒍᑦ ᐃᑦᒪᓐᑕᓐᑯᑦ ᐋᑐᕚᒃᑯᓪᓗ, ᐊᑲᕐᕆᔮᒃᑲᓐᓂᕈᑕᐅᓂᐊᓕᕐᖓᑦ ᐃᖏᕐᕋᔪᓐᓇᕐᓯᓪᓗᑎᖕ ᑲᓇᑕᒥ ᓇᒧᑐᐃᓐᓇᖅ ᐅᐃᔅᔨᐊᑦᑯᑦ ᖃᖓᑕᕕᒋᕙᑦᑕᖏᓐᓄᓐ.

“ᖁᕕᐊᒋᑦᑎᐊᕐᑕᕗᑦ ᓯᕗᓪᓕᖅᐹᑦᓯᐊᒥᖕ ᑲᓇᑕᒥᐅᑦ ᖃᖓᑕᓲᓕᕆᔨᖏᓐᓂᖕ ᑲᓱᖃᑎᖃᕈᓐᓇᕐᓂᐊᓕᕋᑦᑕ ᑲᑐᔾᔨᖃᑎᒌᓐᓂᒃᑯᑦ,” ᐅᖃᓚᐅᕐᑐᖅ ᔮᓐ ᒪᒃᓚᐅᑦ, ᐅᐃᔅᔨᐊᑦ ᐊᖏᔪᖅᑳᖓᑕ ᑐᖏᓕᐊ, ᐊᖏᔪᖅᑳᖅ ᓯᐊᒻᒪᕐᑎᕆᓂᖕᒧᑦ ᑲᑐᔾᔨᖃᑎᒌᓂᖕᒧᓪᓗ. “ᓂᕆᐅᑦᓯᐊᕐᑐᒍᑦ ᑲᓲᑎᔪᓐᓇᕐᓯᓂᐊᓕᕐᖓᑕ ᖃᖓᑕᔪᖁᑎᒋᕙᑦᑕᕗᑦ ᐱᔨᑦᓯᓂᒃᑯᑦ ᖃᓪᓗᓈᓂ ᐅᐃᔅᔨᐊᑦᑯᑎᒍᑦ ᐊᒻᒪ ᑲᓇᑕᐃᑎᐊᓐᑯᑎᒍᑦ ᐅᑭᐅᖅᑕᖅᑐᒥ ᖃᖓᑕᕕᒋᕙᑦᑕᖏᓐᓄᑦ.”

ᐃᓂᑦᓴᓕᐅᕈᒪᒍᕕᑦ ᑲᓇᐃᑎᐊᓐ ᓄᐊᑦᑯᑎᒍᑦ ᐊᒻᒪ ᐅᐃᔅᔨᐊᑦᑯᑦ ᖃᖓᑕᕕᒋᕙᑦᑕᖏᓐᓄᑦ ᖃᕆᑕᐅᔭᒃᑯᑦ ᐃᓂᑦᓴᓕᐅᕈᓐᓇᕐᑐᑎᑦ ᑲᓇᐃᑎᐊᓐ ᓄᐊᑦ ᐱᑐᕝᕕᖓᓄᑦ ᐅᖄᓚᓗᑎᓪᓘᓐᓃᑦ ᐃᓂᑦᓴᓕᐅᕐᕕᑎᓐᓄᑦ, ᐅᕝᕙᓘᓐᓃᑦ ᖃᖓᑕᒍᒪᔪᓄᑦ ᐃᓂᑦᓴᓕᐅᕆᔨᒃᑯᑦ ᐱᔨᑦᓯᕐᑎᖏᑎᒍᑦ.

ᑲᓇᐃᑎᐊᓐ ᓄᐊᑯᑦ ᐅᓂᒃᑳᖓ

ᑲᓇᐃᑎᐊᓐ ᓄᐊᑦᑯᑦ ᖃᖓᑕᓲᓕᕆᔨᐅᖃᑕᐅᕗᑦ ᐊᒻᒪ ᐱᒋᐊᕐᑎᑦᓯᔨᒋᓯᒪᔭᖏᑦ ᐱᓐᖑᕐᑎᑕᐅᒻᒪᓐ ᑲᒻᐸᓂᖓᑦ (ᑲᓇᐃᑎᐊᓐ ᖃᖓᑕᓲᓕᕆᔩᑦ, ᐸᓯᐱᒃ ᕕᐊᔅᑐᓐ, ᑐᕌᓐᔅᐃᐊ, ᓄᐊᑎᐊ) ᐅᐱᒍᓱᒻᒪᕆᒃᑐᑎᖕ ᖃᖓᑕᕙᑦᑐᓂᒃ ᐅᓯᑲᖅᑕᖅᑎᐅᓕᕐᑐᑦ ᐅᓯᑲᕐᑕᖅᑎᐅᓪᓗᑎᓪᓗ ᐱᖁᑎᓂᒃ ᐊᕐᕌᒍᓂᒃ 80ᓂᒃ. ᖃᖓᑕᕙᑦᑐᑦ ᓄᓇᑦᓯᐊᒧᑦ ᓄᓇᕗᒧᓪᓗ ᐊᖅᑯᑎᒋᓪᓗᒋᓐ ᐊᖅᑯᓵᕐᑕᕐᕕᕗᑦ ᓄᓇᓕᕐᔪᐊᑦ ᖃᓪᓗᓈᓂ ᐃᑦᒪᓐᑕᓐ ᐋᑐᕚᓗ, ᐊᐅᓪᓚᕐᕕᐅᒐᔪᑦᑐᓪᓗ ᒫᓂᑑᕙᒧᓐ ᓄᓇᕗᒧᓪᓗ ᑲᑐᔾᔨᖃᑎᒋᓪᓗᒋᑦ ᑳᒻ ᐃᐊᒃᑯᑦ. ᑲᓇᐃᑎᐊᓐ ᓄᐊᑦᑯᑦ ᐃᓂᑦᓴᓕᐅᕆᐊᑐᓐᖏᑦᑐᒃᑯᑦ ᐊᑭᓖᓯᒪᓗᓂ ᓵᑕᕋᑦᓴᐅᓪᓗᑎᒃ ᓴᓇᔨᕐᔪᐊᓄᑦ ᐱᔨᒃᓯᐸᑦᑕᖏᓐᓄᑦ, ᐱᓐᖑᐊᕐᑏᑦ ᐊᑭᑦᑐᕋᐅᑎᓂᖏᓐᓂ, ᐃᓄᒋᐊᑦᑐᓂᓪᓗ ᐅᓯᔭᕆᐊᖃᕐᐸᑕ. ᑲᓇᐃᑎᐊᓐ ᓄᐊᑦᑯᑦ ᐃᓚᒋᔭᐅᒋᕗᑦ ᓄᐊᑎᐅᕋ ᑎᒥᖁᑖᓄᑦ ᑲᒻᐸᓂᖁᑎᓕᓐᓄᑦ ᐊᑖᓃᑦᑐᑎᒃ ᑯᐊᐳᓖᓴᐅᒻ, ᓄᐊᑎᐅᕋ ᐃᓐᑯᐊᐳᓖᑎᑦ ᐃᓕᑕᕆᔭᐅᓯᒪᔪᑦ (NorTerra Inc.), ᓇᓕᒧᒌᒥᒃ ᓇᖕᒥᓂᕆᔭᐅᓪᓗᓂ ᓄᓇᓯ ᑯᐊᐳᓖᓴᒃᑯᓐᓄᑦ, ᓄᓇᕗᒥᐅᑦ ᐃᓄᖁᑎᖏᓐᓂᖕ ᑭᒡᒐᕐᑐᐃᓪᓗᑎᒃ, ᐊᒻᒪ ᐃᓄᕕᐊᓗᐃᑦ ᐱᕙᓪᓕᐊᑎᑦᓯᔩᑦ ᑯᐊᐳᓖᓴᖓᓐᓂᒃ, ᐃᓄᕕᐊᓗᐃᑦ ᐃᓄᖁᑎᖏᓐᓂᒃ ᐅᐊᓚᓂᕐᖕᒥᐅᓂᒃ ᑭᒡᒐᕐᑐᐃᓪᓗᑎᒃ.


ᑐᑭᓯᒋᐊᒃᑲᓐᓂᕈᒪᒍᕕᑦ ᑐᓴᕋᑦᓴᒥᖕ, ᖃᐅᔨᒋᐊᕈᓐᓇᕐᑐᑎᑦ ᐅᑯᓄᖓ:

ᓖᓴ ᕼᐃᒃᔅ                                                                                  ᑐᓴᐅᑎᓕᕆᔨᑦ
ᐊᖏᔪᖅᑳᖅ,                                                                               ᐅᐃᔅᔨᐊᑦ
ᓂᐅᕐᕈᑎᑦᓴᓕᐅᕐᓂᕐᒧᑦ ᓴᖅᑭᔮᕐᑎᑦᓯᔨᓄᑦ                                   media@westjet.com
ᑲᓇᐃᑎᐊᓐ ᓄᐊᑦ ᖃᖓᑕᓲᓕᕆᔩᑦ
lhicks@canadiannorth.com

ᐅᖄᓚᐅᑖ: (867) 669-4000 – ᐅᕗᖓᓘᓐᓃᓐ –                     1-888-WJ-4-NEWS
(403) 503-2310                                                                     (1-888-954-6397)
ᓱᒃᑲᔪᒃᑯᑦ: (867) 669-4040 – ᐅᕗᖓᓘᓐᓃᓐ –
(403) 250-2019