ᐅᕉᕋ ᑳᓐᓯᐅᕐᔾ

ᐊᕈᐊᕋ ᐃᑲᔪᖅᑎᑦ ᑖᓐᓇ ᑲᓇᑕᒥ ᐊᑕᐅᓯᑐᐊᑦᓯᐊᖅ ᐅᑭᐅᖅᑕᖅᑐᕐᒥᑦ ᑎᖕᒥᓲᒃᑰᕋᔪᒃᑐᓄᑦ ᐊᐅᓚᔭᒃᓴᖅ. ᐋᕐᕿᒃᓱᖅᑕᐅᓚᐅᖅᑐᖅ ᑐᓂᕐᕈᓯᐊᕈᑕᐅᓗᓂ ᐃᓕᑕᖅᓯᔾᔪᑕᐅᓗᓂᓗ ᐃᓕᖕᓂᒃ, ᐱᒻᒪᕆᐅᓂᖅᐹᖅ ᓂᐅᕕᖅᑎᒋᔭᑦᑎᓐᓂᒃ, ᐅᕙᑦᑎᓐᓂᒃ ᑎᖕᒥᓲᒃᑰᕋᔪᖕᓂᕐᒧᑦ.

ᐊᑐᖃᖅᑕᕐᓂᕈᕕᑦ ᐃᖏᕐᕋᓂᕐᒧᑦ ᑭᒡᒐᖅᑐᖅᑎᐅᑉ ᐱᔨᑦᓯᕋᐅᑎᖏᓐᓂᒃ, ᖃᐅᔨᒪᑎᓐᓂᐊᖅᐸᑎᑦ ᐊᕈᐊᕋ ᐃᑲᔪᖅᑎᒃᑯᓐᓂᑦ ᐃᓚᐅᒐᕕᑦ ᓄᑖᙳᖅᑎᕈᓐᓇᕐᓂᐊᕐᒪᑕ ᑲᒪᒋᔭᐅᔾᔪᑎᑎᑦ. Canadian North-ᑯᑎᒍᑦ ᑎᖕᒥᓲᒃᑰᕈᑎᖕᓂᒃ ᐋᕐᕿᒃᓱᐃᒍᕕᑦ, ᐅᖃᐅᑎᓂᐊᖅᐸᑦ ᐃᓄᓕᐅᕆᔨ.

ᐊᔪᙱᑎᑕᐅᓂᕐᒧᑦ ᒪᓕᒋᐊᓖᑦ

ᑎᖕᒥᓲᒃᑰᕐᓗᑎᑦ ᐅᑎᒧᑦ 10-ᖏᖅᑕᕐᓗᒍ (ᐅᕝᕙᓘᓐᓃᑦ 20-ᖏᖅᑕᕐᓗᑎᑦ ᑎᖕᒥᓲᒃᑰᓱᖓᕐᓗᑎᑦ) Canadian North-ᑯᑦ ᐊᑯᓐᓂᖓᓂᑦ ᓄᕕᐱᕆ 1 ᐊᒻᒪ ᐅᑐᐱᕆ 31 ᐊᔪᙱᑎᑕᐅᓂᐊᕋᕕᑦ ᐊᕐᕌᒍᑕᒫᒧᑦ ᐃᓚᓕᐅᕈᑎᖃᕐᓂᕐᒥᒃ.

ᖃᐅᔨᒪᒋᑦ - ᓇᓗᓇᐃᒃᑯᑕᖃᖃᑎᒌᑦ ᑎᖕᒥᓲᒃᑰᕐᓃᑦ Air Canada-ᑯᓐᓄᑦ ᐊᐅᓚᑕᐅᔪᑦ ᑎᖕᒥᓲᑦ ᐃᓚᐅᑎᑕᐅᙱᑦᑐᑦ ᐊᕈᐊᕋ ᐃᑲᔪᖅᑎᒃᑯᓐᓄᑦ ᐃᓚᓕᐅᕈᑎᖃᕐᓂᕐᒥᒃ.

ᐊᕈᐊᕋ ᐃᑲᔪᖅᑎᒃᑯᓐᓄᑦ ᐃᓚᓕᐅᕈᑎᑖᖅᑑᓪᓗᐊᖅᑐᑦ ᒪᑯᓂᖓ ᐱᕚᓪᓕᕈᑎᓂᒃ ᐱᔪᖕᓇᓛᖅᑐᑦ:

ᐊᑐᐃᓐᓇᖃᒻᒪᕆᖕᓂᖅ ᐊᕈᐊᕋ ᐃᑲᔪᖅᑎᑎᓐᓂᒃ ᐃᑲᔪᖅᑕᐅᔪᒪᒍᕕᑦ ᐊᔾᔨᐅᖏᑦᑐᓂᒃ ᐱᔪᒪᓂᕐᓂᒃ.

ᐊᕈᐊᕋ ᐃᑲᔪᖅᑎᑦ ᐊᑐᐃᓐᓇᐅᔪᑦ ᑲᒪᒋᔭᖃᕐᓂᕐᒥᒃ ᖃᓄᑐᐃᓐᓇᖅ ᐊᔾᔨᐅᖏᑦᑐᓂᒃ ᐱᔪᒪᔭᕐᓂᒃ. ᐱᔨᑦᓯᕋᖅᑕᐅᔪᒪᒍᕕᑦ, ᖃᐅᔨᒋᐊᕐᕕᒋᓗᒍ ᐃᑲᔪᕐᕕᒃ ᐃᕐᖃᓇᐃᔭᕐᓇᐅᑎᓪᓗᒍ ᐅᖄᓚᓗᑎᑦ ᐊᑭᖃᙱᑦᑐᒃᑯᑦ 1-877-669-4044. ᔭᓗᓇᐃᒥᑦ, ᐅᖄᓚᓗᑎᑦ 669-4044. ᐃᖢᕐᕆᔾᔪᑎᒃᓴᕐᓄᑦ, ᑖᒃᑯᐊ ᓈᓴᐅᑎᑦ ᐃᓚᓕᐅᕈᑎᒃᐱᑦ ᐊᐅᒃᑕᔫᑉ ᑐᓄᐊᓂᑦ ᑎᑎᕋᖅᓯᒪᔪᑦ.

ᐅᓄᖅᓯᑎᒋᐊᖅᓯᒪᔪᑦ Aeroplan-ᑯᑦ ᑏᖕᒥᓲᒃᑰᕈᑎᒃᓴᖃᒃᑲᓐᓂᕐᓂᖅ

ᐃᒃᓯᕙᐅᑕᑦ ᐊᑐᐃᓐᓇᐅᖏᓕᕌᖓᑕ Canadian North ᑎᖕᒥᓲᒃᑰᕈᑎᖏᑎᒍᑦ ᐊᑐᕐᓗᓂ Aeroplan ᐅᖄᓚᒡᕕᖓᑎᒍᑦ, ᖃᐅᔨᒋᐊᕐᓗᑎᑦ ᐊᕈᐊᕋ ᐃᑲᔪᖅᑎᑦᑎᓐᓂᒃ ᐅᓄᖅᓯᑎᒋᐊᖅᓯᒪᔪᑦ ᐃᒃᓯᕙᐅᑕᑦ ᐊᑐᐃᓐᓇᐅᑎᑕᐅᔪᑦ ᒥᒃᓵᓄᑦ (ᐃᓚᐅᔪᓄᑦ Aeroplan-ᒥᒃ).

* ᐃᐅᕈᐸᓚᓐᑯᑦ (Aeroplan) ᐃᓂᒃᓴᓕᐅᕐᑐᐃᑦ ᑎᓴᒪᓂᒃ ᐃᓐᓯᒃᓴᓕᐅᕈᓐᓇᖅᑐᐃᑦ ᐊᒻᒪᓗ ᐃᓂᒃᓴᖃᙱᑐᐃᓐᓇᕆᐊᓖᑦ

ᕿᔪᖁᑎᒃᑲᓐᓂᕐᓂᒃ ᐃᑳᖅᑎᑦᓯᔪᖕᓇᕐᓂᖅ

ᐊᕈᐊᕋ ᐃᑲᔪᖅᑎᓄᑦ ᐃᓚᓕᐅᕈᑎᖃᖅᑐᑦ ᐃᑳᖅᑎᑦᓯᔪᖕᓇᖅᑐᑦ ᐱᖓᔪᖓᓂᒃ ᕿᔪᖁᑎᒥᒃ (70 ᐸᐅᔅ ᑎᑭᓪᓗᒍ) ᐊᑭᖃᙱᑦᑐᒥᒃ, ᐃᖏᕐᕋᑎᓪᓗᒋᑦ ᑎᖕᒥᓲᒃᑯᑦ ᐊᐅᓚᑕᐅᔪᒃᑯᑦ Canadian North-ᑯᑦ.

ᐊᑭᖃᙱᑦᑐᑦ ᑎᖕᒥᓲᒥ ᐃᒥᒐᒃᓴᑦ

ᐃᒥᐊᓗᐃᑦ (ᓇᖕᒥᓂᖅ ᐃᒥᒐᒃᓴᑦ) ᐊᑭᖃᙱᑦᑐᑦ ᑕᑯᑎᑦᓯᒍᕕᑦ ᐃᓚᓕᐅᕈᑎᖏᓂᒃ ᐅᕝᕙᓘᓐᓃᑦ ᑎᖕᒥᓲᕐᒧᑦ ᐃᑭᔾᔪᑏᑦ, ᓇᓗᓇᐃᖅᓯᒪᔪᖅ ᐃᓚᓕᐅᕈᑎᖃᕐᓂᕐᓂᒃ.

ᓯᕗᓪᓕᐅᑎᑕᐅᓗᑎᑦ ᐃᑭᔾᔪᑎᑖᕐᓂᖅ

ᐊᕈᐊᕋ ᐃᑲᔪᖅᑎᓄᑦ ᐃᓚᓕᐅᕈᑎᖃᖅᑐᑦ ᓯᕗᓪᓕᐅᑎᑕᐅᓗᑎᒃ ᐃᑭᔾᔪᑎᑖᕈᖕᓇᖅᑐᑦ ᒥᒃᑕᕐᕕᖕᓂᑦ ᔭᓗᓇᐃᒥᑦ, ᐃᓅᕕᖕᒥᑦ ᐊᒻᒪ ᐃᐊᑦᒪᓐᑕᓐᒥᑦ. ᕿᓂᕐᓗᒍ ᐊᕈᐊᕋ ᐃᑲᔪᖅᑎᒃᑯᑦ ᐃᑭᔾᔪᑎᑖᕐᕕᒃ ᓇᓗᓇᐃᒃᑯᑕᖅ.

ᓯᕗᓪᓕᐅᑎᑕᐅᓗᓂ ᑎᖕᒥᓲᒧᑦ ᐃᑭᔪᖕᓇᕐᓂᖅ

ᓯᕗᓪᓕᐅᓗᑎᑦ ᐃᑭᔪᖕᓇᖅᑎᑕᐅᓛᖅᑐᑎᑦ ᑎᖕᒥᓲᖅ ᓯᕗᓪᓕᐅᑎᑕᐅᕙᒃᑐᓄᑦ ᐃᑭᕝᕕᒋᔭᐅᓕᖅᑎᓪᓗᒍ, ᐅᕝᕙᓘᓐᓃᑦ ᖃᖓᑐᐃᓐᓇᖅ ᐱᔪᒪᓕᕈᕕᑦ ᐃᑭᔪᖕᓇᑦᓯᐊᖅᑐᑎᑦ.

"Fly-Thru" ᐃᐊᑦᒪᓐᑕᓐᒥᑦ ᓴᐳᒻᒥᔨᒃᑰᕐᕕᒃ

ᐃᓚᓕᐅᕈᑎᖃᖅᑐᑦ ᐊᑐᕈᖕᓇᖅᑎᑕᐅᔪᖅ ᐃᑳᕐᓗᑎᒃ "Fly-Thru", ᓯᕗᓪᓕᐅᑎᑕᐅᔪᓄᑦ ᓴᐳᒻᒥᔨᒃᑰᕐᕕᒃ ᐃᐊᑦᒪᓐᑕᓐ ᓄᓇᕐᔪᐊᕐᒨᓕᖓᔪᖅ ᒥᒃᑕᕐᕕᖓᓂ. ᐅᑕᕐᕿᖃᑦᑖᕐᓇᙱᓕᕐᓗᓂ - ᑕᑯᑎᑐᐃᓐᓇᕐᓗᒍ ᐃᑭᔾᔪᑏᑦ ᐊᕈᐊᕋ ᐃᑲᔪᖅᑎᑦ ᓂᐱᙵᑖᓕᖅᓯᒪᔪᖅ ᓴᐳᒻᒥᔨᒃᑰᕐᕕᖕᒥᑦ ᐊᒻᒪ ᓱᑲᓐᓂᖅᓴᒃᑐᑦ ᑎᖕᒥᓲᒃᑰᕐᕕᒋᓂᐊᖅᑕᕐᓂᒃ ᐅᑕᕐᕿᕕᖕᒧᐊᑲᐅᑎᒋᓕᕐᓗᑎᑦ.

ᑎᖕᒥᓲᒃᑰᕈᑎᖕᓂᒃ ᐊᓯᔾᔨᕐᓂᕐᒧᑦ ᐊᑭᓕᐅᑎ ᐲᖅᑕᐅᓗᓂ

ᐃᒃᓯᕙᐅᑕᓂᒃ ᐊᑐᐃᓐᓇᖅᑕᖃᕈᓂ ᓱᓕ ᐊᑭᓕᓚᐅᖅᑕᕐᓂᒃ ᐊᔾᔨᖃᖅᑐᒥᒃ, ᐊᓯᔾᔨᕐᓂᕐᒧᑦ ᐊᑭᓕᐅᑎ ᐲᓛᖅᑕᕗᑦ ᐊᑮᑎᓚᐅᕋᔭᕋᓗᐊᖅᑎᓪᓗᑦᑎᒋᑦ. ᖃᐅᔨᒪᒋᑦ, ᑕᒪᓐᓇ ᐊᑐᙱᑦᑐᖅ ᑎᖕᒥᓲᒃᑰᕈᑎᑖᕐᓂᐅᔪᓄᑦ ᐊᙳᑎᒋᐊᖃᖅᑐᓄᑦ ᑎᖕᒥᓲᓄᑦ ᐅᕝᕙᓘᓐᓃᑦ Canadian North ᐱᓕᕆᖃᑎᒋᔭᖓᑎᒍᑦ.

ᓇᖕᒥᓂᕐᒨᓕᖓᔪᒥᒃ ᐃᓚᓕᐅᕈᑎᒥᒃ ᐊᐅᒃᑕᔫᖅᑖᕐᓗᑎᑦ ᕿᔪᖁᑎᖕᓄᓪᓗ ᓇᓗᓇᐃᒃᑯᑕᕐᓂᒃ

ᓇᖕᒥᓂᕐᒨᓕᖓᔪᖅ ᐃᓚᓕᐅᕈᑏᑦ ᐊᐅᒃᑖᔪᖅ ᐱᓯᒪᓗᒍ ᐃᖏᕐᕋᓕᕌᖓᕕᑦ ᐱᔭᐅᔭᕆᐊᖃᕐᒪᑦ ᐊᑐᕈᖕᓇᕐᓂᐊᕈᕕᒋᑦ ᐊᕈᐊᕋ ᐃᑲᔪᖅᑎᑦ ᐱᔨᑦᓯᕋᐅᑎᖏᑦ. ᑕᑯᑎᑐᐃᓐᓇᕐᓗᒍ ᐊᐅᒃᑕᔫᑦ ᐃᑭᔾᔪᑎᑖᓕᕈᕕᑦ ᓂᐱᙵᑖᕐᒥᒃ ᑐᓂᔭᐅᓂᐊᕋᕕᑦ ᐃᓕᖕᓂᖅ ᓇᓗᓇᐃᕆᓂᐊᖅᑐᒥᒃ ᐃᓚᓕᐅᕈᑎᖃᕋᕕᑦ ᐃᖏᕐᕋᓂᓕᒫᕐᓂᒃ ᑎᖕᒥᓲᒃᑯᑦ. ᐊᐅᒃᑕᔫᖁᑏᑦ ᐃᓚᓕᐅᕈᑏᓪᓗ ᐃᓕᖕᓄᑦ ᓇᖕᒥᓂᕐᒨᓕᖓᔪᑦ, ᓅᑕᐅᔪᖕᓇᖏᑦᑐᑦ ᐊᓯᐊᓄᑦ.