ᑲᙳᓇᖅᑐᓄᑦ ᐊᑐᐊᒐᖅ

Canadian North Inc., ᐊᐅᓚᑎᓪᓗᓂ ᐊᑎᒃᑯᒃ ᑲᓇᑕᐅᑉ ᐅᑭᐅᖅᑕᖅᑐᖓ (Canadian North), ᓇᖕᒥᓂᕆᔭᐅᔪᖅ ᐊᑎᓕᐅᖅᑕᐅᓯᒪᔪᖅ ᑲᓇᑕᐅᑉ ᒪᓕᒐᖏᑎᒍᑦ, ᐊᖓᔪᕐᖃᐅᓯᕝᕕᖃᖅᖢᓂ ᐅᕙᓂ 200, 580 Palmer Road NE, Calgary AB T3E 7R3. ᑖᓐᓇ ᐅᖃᐅᓯᖅ "Canadian North" ᐊᑐᖅᑕᐅᔭᕌᖓᒥ ᑕᒡᕙᓂ ᐊᑐᐊᒐᕐᒥᑦ, ᑐᑭᖃᖅᑐᖅ Canadian North Inc.

ᑎᖕᒥᓲᓕᕆᔨᐅᑎᓪᓗᓂ ᐊᐅᓚᕝᕕᖃᖅᑐᖅ ᐅᑭᐅᖅᑕᖅᑐᒥᑦ ᑲᓇᑕᒥ, Canadian North ᐅᔾᔨᕆᔭᖃᑦᓯᐊᒻᒪᕆᒃᑐᖅ ᐊᔾᔨᐅᖏᓐᓂᖓᑕ ᑕᑯᑎᑕᐅᑦᑕᐃᓕᓂᕐᒧᑦ ᑲᒪᒋᔭᒃᓴᓂᒃ ᒥᑭᓐᓂᖅᓴᓂᒃ ᓄᓇᓕᖕᓂᑦ. ᐊᖏᕐᕋᖃᖅᖢᓂ ᐃᓄᒋᐊᙱᑐᒥᑦ ᓄᓇᒥᑦ, ᐅᑭᐅᖅᑕᖅᑐᕐᒥᐅᑕᑦ ᐊᑯᓂ ᑐᙵᓱᒃᑎᑦᓯᓯᒪᒻᒪᕆᒃᑐᑦ ᓄᑖᓂᒃ ᑎᑭᑦᑐᓂᒃ ᐃᓚᐅᖃᑕᐅᖢᑎᒡᓗ ᓄᓇᓕᖏᓐᓂᒃ ᐱᕙᓪᓕᐊᑎᑦᓯᓂᕐᒥᒃ. ᑕᒪᒃᑯᐊ ᐊᑐᖅᑕᐅᔪᑐᖃᐃᑦ ᑕᐃᒪᐅᖏᓐᓇᖅᑎᑕᐅᔭᕆᐊᖃᖅᑐᑦ, ᐊᒻᒪ ᐊᑐᓕᖅᑎᑕᐅᓂᖏᑦ ᑲᓇᑕᐅᑉ ᓄᑖᖅ ᑕᑯᑎᑕᐅᑦᑕᐃᓕᓂᕐᒧᑦ ᒪᓕᒐᖓ, ᒐᕙᒪᑐᖃᒃᑯᑦ ᓇᖕᒥᓂᖅ ᑐᑭᓯᒋᐊᕈᑎᒃᓴᓂᒃ ᓴᐳᒻᒥᓂᕐᒧᑦ ᐊᒻᒪ ᖃᕆᑕᐅᔭᒃᑰᓕᖓᔪᑦ ᑎᑎᕐᖃᓄᑦ ᒪᓕᒐᖓ ("PIPEDA") ᐅᑭᐅᖅᑕᖅᑐᕐᒥᑦ ᐊᒃᑎᖃᑎᖃᕆᐊᖃᖅᑐᑦ ᑕᒪᒃᑯᓂᖓ ᐃᓱᒫᓘᑎᓂᒃ.

ᖃᕆᑕᐅᔭᒃᑰᓕᖓᔪᑦ ᐊᔪᕐᓇᕈᖕᓇᐃᖅᑎᑦᓯᒪᒋᓐᓇᖅᑎᖢᒋᑦ ᑐᓂᐅᕐᖃᐃᓂᕐᒥᒃ ᐊᒥᕐᖄᖃᑎᒌᖕᓂᕐᒥᒡᓗ ᑐᑭᓯᒋᐊᕈᑎᒃᓴᓂᒃ, ᒪᓕᒐᖅᑕᖃᕆᐊᖃᖅᑐᖅ ᐊᐅᓚᑦᓯᔾᔪᑎᒥᒃ ᑲᑎᖅᓱᐃᓂᕐᒥᒃ, ᐊᑐᕐᓂᕐᒥᒃ ᐊᒻᒪ ᑕᑯᑎᑦᓯᓂᕐᒥᒃ ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᓂᒃ ᐊᑐᖅᑕᐅᓂᐊᕐᓗᑎᒃ ᓈᒻᒪᑦᓯᐊᖅᑐᖅ ᐅᑭᐅᖅᑕᖅᑐᕐᒥᐅᑕᖅ ᐃᓱᒪᒃᓴᖅᓯᐅᕈᑎᖃᕋᔭᖅᑐᖅ ᓈᒻᒪᖕᓂᖓᑕ ᖃᓄᐃᓐᓂᐅᔪᓂᒃ.

ᑐᑭᖏᑦ
ᒪᑯᐊ ᑐᑭᒋᔭᐅᔪᑦ ᐊᑐᖅᑐᖅ ᑕᒡᕗᖓ ᑕᑯᑎᑕᐅᑦᑕᐃᓕᓂᕐᒧᑦ ᐊᑐᐊᒐᕐᒧᑦ:

  • "ᑲᑎᖅᓱᐃᓂᖅ" - ᖃᓄᑐᐃᓐᓇᖅ ᑲᑎᖅᓱᐃᓂᖅ ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᓂᒃ ᓇᑭᑐᐃᓐᓇᖅ, ᐃᓚᒋᓗᒋᑦ ᐊᓯᖏᓐᓂᒃ, ᖃᓄᑐᐃᓐᓇᑦᓯᐊᖅ.
  • "ᐊᖏᖅᓯᒪᓂᖅ" - ᐃᖕᒥᒃᑯᑦ ᐊᖏᖅᓯᒪᓂᖅ ᐱᓕᕆᐊᖑᔪᒥᒃ ᑐᒃᓯᕋᖅᑕᐅᔪᒥᒡᓘᓐᓃᑦ. ᐊᖏᖅᓯᒪᓂᖃᕈᖕᓇᖅᑐᖅ ᓇᓗᓇᐃᖅᑕᐅᑦᓯᐊᕐᓗᓂ ᑐᑭᓯᔭᐅᑎᓪᓗᓂᓘᓐᓃᑦ. ᓇᓗᓇᐃᖅᑕᐅᑦᓯᐊᕐᓗᓂ ᐊᖏᖅᓯᒪᓂᖅ ᐅᖃᐅᔾᔭᐅᒻᒪᕆᒡᓗᓂ, ᐃᒻᒪᖄ ᓂᐱᒃᑯᑦ ᑎᑎᕐᖃᒃᑯᓪᓘᓐᓃᑦ. ᓇᓗᓇᐃᖅᑕᐅᑦᓯᐊᕐᓗᓂ ᐊᖏᖅᓯᒪᓂᖅ ᓱᓕᒻᒪᕆᒃᑐᖅ ᓇᓚᐅᑦᓵᖅᑕᐅᒋᐊᖃᕐᓇᖏᖢᓂ ᐊᖏᖅᑕᐅᖁᔪᒧᑦ. ᑐᑭᓯᔭᐅᑎᓪᓗᓂ ᐊᖏᖅᓯᒪᓂᖅ ᑕᐃᒪᐅᕙᒃᑐᖅ ᑖᓐᓇ ᐊᖏᖅᓯᒪᓂᖅ ᓇᓚᐅᑦᓵᖅᑕᐅᔾᔪᑕᐅᔪᖕᓇᖅᖢᓂ ᐊᖏᖅᑐᒃᓴᐅᔫᑉ ᖃᓄᐃᓕᐅᕐᓂᖓᒍᑦ ᖃᓄᐃᓕᐅᙱᓂᖓᒍᓪᓘᓐᓃᑦ.
  • "ᖃᐅᔨᒪᓕᖅᑎᑦᓯᓂᖅ" - ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᓂᒃ ᐊᑐᐃᓐᓇᐅᑎᑦᓯᓂᖅ ᐊᓯᖏᓐᓄᑦ Canadian North ᓯᓚᑖᓄᑦ.
  • "ᓇᖕᒥᓂᖅ ᑐᑭᓯᒋᐊᕈᑎᒃᓴᕆᔭᐅᔪᑦ" - ᑐᑭᖃᖅᑐᖅ ᑐᑭᓯᒋᐊᕈᑎᒃᓴᑦ ᑭᓇᑐᐃᓐᓇᕐᒥᒃ ᑭᓇᐅᓂᖓᓂᒃ ᓇᓗᓇᐃᖅᓯᔪᖕᓇᖅᑐᑦ, ᑭᓯᐊᓂ ᐃᓚᖃᙱᖢᓂ ᐊᑎᖓᓂᒃ, ᐱᓕᕆᐊᖓᓂᒃ ᐅᕝᕙᓘᓐᓃᑦ ᓇᖕᒥᓂᕆᔭᖓᑕ ᑐᕌᕈᑖᓂᒃ ᐅᕝᕙᓘᓐᓃᑦ ᐅᖄᓚᐅᑖᑕ ᓈᓴᐅᑖᑕ ᐃᕐᖃᓇᐃᔭᖅᑎᒋᔭᐅᔫᑉ.
  • "ᐊᑐᕐᓂᖅ" - ᖃᓄᐃᓕᐅᕈᑕᐅᓂᖅ ᐊᒻᒪ ᑲᒪᒋᔭᐅᓂᖅ ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᓂᒃ ᐃᓗᐊᓂᑦ Canadian North.

ᒪᓕᒃᑕᐅᔾᔪᑎ 1: ᑲᒪᓲᑎᖃᕈᖕᓇᕐᓂᖅ

ᑲᒪᓲᑎᖃᕈᖕᓇᕐᓂᖅ Canadian North ᒪᓕᒋᐊᓕᖏᓐᓂᒃ ᑖᒃᑯᓇᙵᑦ ᑕᑯᑎᑕᐅᔭᕆᐊᖃᙱᓂᕐᒧᑦ ᒪᓕᒃᑕᐅᔾᔪᑎᓂᒃ ᑲᒪᒋᔭᐅᓛᖅᑐᑦ ᑭᓇᑐᐃᓐᓇᕐᒧᑦ ᑎᒃᑯᐊᖅᑕᐅᔪᒧᑦ ᐱᔨᑦᓯᕋᕐᓂᕐᒧᑦ ᐊᖓᔪᕐᖄᑉ ᑐᒡᓕᐊᓄᑦ ᖃᖓᑐᐃᓐᓇᖅ. ᑖᓐᓇ ᑎᒃᑯᐊᖅᑕᐅᓯᒪᔪᖅ ᐊᓯᖏᓐᓂᒃ ᑎᒃᑯᐊᖅᓯᔪᖕᓇᖅᑐᖅ ᑭᒡᒐᖅᑐᖅᑕᐅᔪᒪᒍᓂ. ᑖᓐᓇ ᑎᒃᑯᐊᖅᑕᐅᓯᒪᔪᖅ ᑕᐃᔭᐅᓛᖅᑐᖅ "ᑕᑯᑎᑕᐅᔭᕆᐊᖃᙱᓂᕐᒥᒃ ᒪᖕᓂᕐᒥᒃ ᐊᐅᓚᑦᓯᔨ".

Canadian North ᑲᒪᒋᔭᖃᖅᑐᖅ ᑕᒪᐃᓐᓂᒃ ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᓕᒫᓂᒃ ᐱᓯᒪᔭᖏᓐᓂᒃ ᓇᔪᖅᑕᖏᓐᓂᒡᓘᓐᓃᑦ, ᐃᓚᒋᓗᒋᑦ ᑐᑭᓯᒋᐊᕈᑎᒃᓴᑦ ᐊᓯᐊᒍᑦ ᑐᓂᔭᐅᓯᒪᔪᑦ, ᐃᒻᒪᖄ ᑭᒡᒐᖅᑐᖅᑎᖓᓄᑦ ᓄᓇᓕᒋᔭᕐᓂᑦ, ᐅᕝᕙᓘᓐᓃᑦ ᐊᓯᐊ ᐅᕙᑦᑎᓐᓂᒃ ᐃᑲᔪᖅᑐᖅ ᐱᔫᒥᓵᕆᓂᕐᒥᒃ. Canadian North-ᑯᑦ ᐃᕐᖃᓇᐃᔭᖅᑎᖓ ᑐᒃᓯᕋᖅᑐᖅ ᐅᕝᕙᓘᓐᓃᑦ ᒥᐊᓂᖅᓯᔪᖅ ᑕᐃᒪᐃᑦᑐᓕᕆᓂᕐᒥᒃ ᑲᒪᒋᔭᖃᖅᑐᖅ ᐊᖏᖃᑎᒌᖕᓂᒃᑯᑦ ᐃᕐᖃᓇᐃᔭᖅᑎᑕᐅᔪᖅ ᐊᓯᐊ ᓈᒻᒪᑦᓯᐊᖅᑐᒥᒃ ᓴᐳᒻᒥᓂᖃᕐᓂᐊᕐᒪᑦ ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᑦ ᑲᒪᒋᔭᐅᑎᓪᓗᒋᑦ ᑕᐃᒪᐃᑦᑐᒧᑦ ᐊᓯᐊᓄᑦ. ᑕᒪᓐᓇ ᑐᑭᖃᕋᔪᒃᑐᖅ ᑐᓂᓯᓂᕐᒥᒃ ᑕᑯᑎᑕᐅᔭᕆᐊᖃᙱᓂᕐᒧᑦ ᐊᑐᐊᒐᐅᑉ ᐊᔾᔨᖃᓂᒃ ᑕᐃᒪᐃᑦᑐᒧᑦ ᐊᓯᐊᓄᑦ ᐊᒻᒪ ᑎᑎᕋᖅᓯᒪᔪᒃᑯᑦ ᐊᖏᖅᓯᒪᓂᖅ ᑕᐃᒪᐃᑦᑐᒥᒃ ᐊᓯᐊᓂᒃ ᒪᓕᖃᑕᐅᓂᐊᕐᓂᕋᖅᓯᒪᔪᒥᒃ ᐊᑐᐊᒐᕐᒥᒃ. ᑐᓂᔭᐅᒃᑲᓐᓂᖅᑐᒃᓴᑦ ᐃᓚᖃᖅᑐᑦ ᐅᑎᖅᑎᑦᓯᓂᕐᒥᒃ ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᓂᒃ Canadian North-ᒧᑦ ᐱᔭᕇᖅᑕᐅᑐᐊᕈᓂᒃ, ᐊᖏᖃᑎᒌᒍᑎ ᐃᒫᑐᑦ ᑐᑭᓯᒋᐊᕈᑎᒃᓴᓂᒃ ᐊᑐᕐᓂᐅᖏᓪᓗᓂ, ᐊᒻᒪ ᓄᖑᑎᕆᓂᖅ ᑎᑎᕋᖅᓯᒪᔪᓕᒫᓂᒃ ᐱᔭᐅᓯᒪᔪᓂᒃ ᐊᓯᐊᓄᑦ.

Canadian North ᐊᑐᓕᖅᑎᑦᓯᓂᐊᖅᑐᖅ ᐊᑐᐊᒐᕐᓂᒃ ᐊᑐᖅᑕᐅᔭᕆᐊᖃᖅᑐᓂᒡᓗ ᐱᙳᖅᑎᑦᓯᓂᐊᖅᑐᓂᒃ ᑖᑉᓱᒪᙵᑦ ᑕᑯᑎᑕᐅᔭᕆᐊᖃᙱᓂᕐᒧᑦ ᐊᑐᐊᒐᕐᒥᒃ, ᐃᓚᒋᓗᒍ;

  • ᐊᑐᓕᖅᑎᑦᓯᓂᖅ ᐊᑐᖅᑕᐅᖃᑦᑕᖅᑐᓂᒃ ᓴᐳᒻᒥᓂᕐᒥᒃ ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᓂᒃ;
  • ᐃᓕᓯᓂᖅ ᐊᑐᖅᑕᐅᖃᑦᑕᖅᑐᓂᒃ ᐱᔪᖕᓇᕐᓂᐊᕐᓗᒋᑦ ᑭᐅᔪᖕᓇᕐᓂᐊᕐᓗᒋᓪᓗ ᐊᑲᐅᙱᓕᐅᕈᑎᖃᕐᓂᕋᖅᑕᐅᔪᑦ ᐊᒻᒪ ᑐᑭᓯᒋᐊᕈᒪᓂᐅᔪᑦ;
  • ᐃᕐᖃᓇᐃᔭᖅᑎᓂᒃ ᐃᓕᓐᓂᐊᖅᑎᑦᓯᓂᖅ ᑐᓴᐅᒪᑎᓪᓗᒋᓪᓗ ᐃᕐᖃᓇᐃᔭᖅᑎᑦ ᑐᑭᓯᒋᐊᕈᑎᒃᓴᓂᒃ Canadian North ᐊᑐᐊᒐᖏᓐᓂᒃ ᐊᑐᖅᑕᐅᖃᑦᑕᖅᑐᖁᑎᖏᓐᓂᒡᓗ; ᐊᒻᒪ
  • ᐋᕐᕿᒃᓱᐃᓂᖅ ᑐᑭᓯᒋᐊᕈᑎᒃᓴᓂᒃ ᐅᓂᒃᑳᕆᓂᐊᕐᓗᒋᑦ Canadian North ᐊᑐᐊᒐᖏᓐᓂᒃ ᐊᑐᖅᑕᐅᖃᑦᑕᖅᑐᖁᑎᖏᓐᓂᒡᓗ.

ᒪᓕᒃᑕᐅᔾᔪᑎ 2: ᐱᔾᔪᑎᒃᓴᓂᒃ ᓇᓗᓇᐃᕆᓂᖅ

ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᓂᒃ ᑲᑎᖅᓱᐃᓂᕐᒥᒃ ᐱᔾᔪᑎᖏᑦ ᓇᓗᓇᐃᖅᑕᐅᔭᕆᐊᖃᖅᑐᖅ Canadian North-ᒧᑦ ᑐᑭᓯᒋᐊᕈᑎᒃᓴᑦ ᑲᑎᖅᓱᖅᑕᐅᕐᖄᖅᑎᓐᓇᒋᑦ ᑲᑎᖅᓱᖅᑕᐅᓕᖅᑎᓪᓗᒋᓘᓐᓃᑦ.

Canadian North-ᑯᓐᓄᑦ ᐃᓚᒋᔭᐅᔪᑦ ᑲᑎᖅᓱᕐᓂᐊᖅᑐᖅ ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᓂᒃ ᐱᔾᔪᑎᖃᕐᓗᑎᒃ ᐃᑯᓄᖓᑐᐊᑦᓯᐊᖅ:

  • ᑎᖕᒥᓲᒃᑰᕐᓂᕐᒥᒃ ᐱᔨᑦᓯᕋᕐᓂᕐᒥᒃ ᐃᓚᒋᓗᒍ ᐃᓂᓕᐅᕐᓂᕐᒥᒃ, ᐃᓕᑖᕐᓂᕐᒥᒃ, ᐊᑭᓕᕐᓂᕐᒥᒃ, ᑲᑎᖅᓱᐃᓂᕐᒥᒃ, ᓴᐳᒻᒥᓂᕐᒥᒃ, ᐅᓗᕆᐊᓇᖅᑐᒦᙱᑎᑦᓯᓂᕐᒥᒃ ᐊᒻᒪ ᐃᖢᕐᕆᑎᑕᐅᓂᕐᒥᒃ, ᓂᐅᕕᖅᑐᓄᑦ;
  • ᒪᓕᖕᓂᕐᒧᑦ ᒐᕙᒪᒃᑯᑦ ᐱᖁᔭᖏᓐᓂᒃ, ᐃᓚᒋᓗᒋᑦ ᐱᓗᐊᖅᑐᒥᒃ ᐃᖏᕐᕋᔪᓕᕆᔨᕐᔪᐊᒃᑯᑦ ᑲᓇᑕᒥ ᐱᖁᔭᖏᓐᓂᒃ;
  • ᓇᓗᓇᐃᖅᓯᓂᕐᒥᒃ ᑐᓴᖅᑎᑦᓯᓂᕐᒥᒡᓗ ᑕᐃᒃᑯᓇᙵᑦ ᐱᔪᒪᔪᓂᒃ ᑐᑭᓯᒋᐊᕈᑎᒃᓴᓂᒃ Canadian North ᐱᔨᑦᓯᕋᐅᑎᖏᑦᑕ ᒥᒃᓵᓄᑦ, ᐊᒻᒪᓗ ᐊᓯᖏᓐᓄ ᐱᔫᒥᓵᕈᑎᓄᑦ;
  • ᐃᓚᐅᓂᖅ ᓂᐅᕕᖅᑎᐅᒐᔪᖕᓂᕐᒧᑦ ᐊᐅᓚᔭᒃᓴᓄᑦ;
  • ᐃᕐᖃᓇᐃᔮᖅᑖᖅᑎᑦᓯᓂᕐᒧᑦ ᐃᕐᖃᓇᐃᔭᖅᑎᐅᓂᕐᒧᓪᓗ ᒥᒃᓵᓄᑦ;
  • ᐃᕐᖃᓇᐃᔭᖅᑎᖏᓐᓂᒃ ᐃᓕᓐᓂᐊᖅᑎᑦᓯᓂᕐᒧᑦ;
  • ᐊᐅᓚᓂᖅ ᖃᕆᑕᐅᔭᖃᕐᕕᖓᓂᒃ;
  • Canadian North ᐊᑐᕋᔪᒃᑐᖅ ᑕᐃᒪᐃᑦᑐᓂᒃ ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᓂᒃ ᑎᖕᒥᓲᓕᕆᓂᖏᓐᓄᑦ ᐊᒻᒪ ᐱᔨᑦᓯᕋᕐᓂᐊᕐᓗᒋᑦ ᓂᐅᕕᖅᑎᒋᔭᖏᑦ ᐅᓂᒃᑲᐅᑕᐅᒐᒥᑐᑦ ᖁᓛᓂᑦ. ᑎᖕᒥᓲᓕᕆᓂᖅ ᓅᑕᐅᓐᓂᕈᓂ ᓄᑖᒧᑦ ᓇᖕᒥᓂᖃᖅᑎᒧᑦ, ᒪᓕᖕᓂᐊᖅᖢᓂ ᑭᒡᓕᖃᕈᑎᒋᔭᖏᑦᑕ ᒪᓕᒃᑕᐅᔾᔪᑎ 5, ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᑦ ᓅᑕᐅᖃᑕᐅᓛᖅᑐᑦ.

ᐱᔾᔪᑎᒃᓴᖏᑦ Canadian North-ᑯᓐᓄᑦ ᐃᓚᒋᔭᐅᔪᖅ ᑲᑎᖅᓱᐃᑎᓪᓗᓂ ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᓂᒃ ᓇᓗᓇᐃᖅᑕᐅᓛᖅᑐᑦ ᐃᓚᒋᔭᐅᔪᑉᒧᑦ ᑐᑭᓯᒋᐊᕈᑎᒃᓴᑦ ᖃᑎᖅᓱᖅᑕᐅᕐᖄᖅᑎᓐᓇᒋᑦ ᐅᕝᕙᓘᓐᓃᑦ ᑲᑎᖅᓱᖅᑕᐅᓕᖅᑎᓪᓗᒋᑦ. ᑭᓯᒥᒃ ᐱᔭᐅᔭᕆᐊᖃᖅᑐᑦ ᑐᑭᓯᒋᐊᕈᑎᒃᓴᑦ ᐱᔾᔪᑎᒃᓴᖃᖅᑐᑦ ᓇᓗᓇᐃᖅᑕᐅᔪᓄᑦ ᑲᑎᖅᓱᖅᑕᐅᔪᖕᓇᖅᑐᑦ. ᐱᔾᔪᑎᒃᓴᑦ ᑲᑎᖅᓱᐃᓂᕐᒧᑦ ᑐᓴᖅᑎᑕᐅᔭᕆᐊᖃᖅᑐᖅ ᑲᒪᒋᔭᐅᔪᕐᒧᑦ ᑭᓇᑐᐃᓐᓇᕐᒧᑦ.

ᒪᓕᒃᑕᐅᔾᔪᑎ 3: ᐊᖏᖅᓯᒪᓂᖅ

ᑭᓇᑐᐃᓐᓇᐅᑉ ᑲᐅᔨᒪᓂᖓ ᐊᖏᖅᓯᒪᓂᖓᓗ ᐱᔭᐅᔭᕆᐊᖃᖅᑐᑦ ᑲᑎᖅᓱᐃᓂᕐᒧᑦ, ᐊᑐᕐᓂᕐᒧᑦ ᐅᕝᕙᓘᓐᓃᑦ ᑕᑯᑎᑕᐅᓂᕐᒧᑦ ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᓂᒃ, ᑭᓯᐊᓂ ᒪᓕᒐᑎᒍᑦ ᑐᓂᔭᐅᓯᒪᒍᓂ.

ᐊᖏᖅᓯᒪᓂᖅ ᐱᔭᐅᔭᕆᐊᖃᖅᑐᖅ ᑲᑎᖅᓯᓂᕐᒥᒃ ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᓂᒃ ᐊᒻᒪ ᐊᑐᖅᑕᐅᓕᕐᓂᖏᓪᓗ ᑕᑯᑎᑕᐅᓕᕐᓂᖏᓪᓘᓐᓃᑦ ᑕᐃᒪᐃᑦᑐᑦ ᑐᑭᓯᒋᐊᕈᑎᒃᓴᑦ. ᐱᔭᐅᔭᕆᐊᖃᙱᓂᐅᔪᑦ ᓇᓗᓇᐃᖅᑕᐅᓯᒪᔪᑦ ᐅᓗᐊᓂᑦ PIPEDA.

ᐱᔨᑦᓯᕋᖅᑎᐅᒍᓂ ᑭᒡᒐᖅᑐᕐᓗᓂ ᐊᓯᐊᓄᑦ ᑎᒥᐅᔪᒧᑦ (ᐃᒫᑐᑦ ᐃᓕᓐᓂᐊᕐᕕᒃ ᑎᖕᒥᓲᕐᒥᒃ ᐊᑐᖅᑐᐊᖅᑐᖅ) ᐱᔾᔪᑎᖃᕐᓗᓂ ᑲᑎᖅᓯᓂᕐᒥᒃ, ᐊᑐᕐᓂᕐᒥᒃ ᐅᕝᕙᓘᓐᓃᑦ ᑕᑯᑎᑦᓯᓂᕐᒥᒃ ᓇᖕᒥᓂ ᑐᑭᓯᒋᐊᕈᑎᒋᔭᐅᔪᓂᒃ, Canadian North ᐃᓚᒋᔭᖓ ᐱᔭᕆᐊᖃᖅᑐᖅ ᒪᓕᒡᓗᓂᓗ ᖃᓄᑐᐃᓐᓇᖅ ᐊᖏᖅᓯᒪᓂᐅᔪᕐᒥᒃ ᐱᔭᐅᓚᐅᖅᓯᒪᔪᒥᒃ ᐃᒫᑐᑦ ᑎᒥᐅᔪᕐᒧᑦ, ᒪᓕᒃᖢᓂᓗ ᐱᔭᕆᐊᖃᙱᓂᐅᔪᓄᑦ ᑐᓂᔭᐅᔪᓄᑦ ᐅᕙᓂ PIPEDA.

Canadian North, ᖃᓄᐃᒋᐊᖃᕐᓂᐅᓗᓂ ᑎᖕᒥᓲᓕᕆᓂᕐᒥᒃ ᐱᔨᑦᓯᕋᕐᓂᕐᒧᑦ ᐅᕝᕙᓘᓐᓃᑦ ᐃᕐᖃᓇᐃᔭᕐᓂᕐᒧᑦ ᐆᒃᑑᑎᒋᓗᒍ, ᐱᔭᕆᐊᖃᕐᓂᐊᖏᓚᖅ ᑭᓇᑐᐃᓐᓇᕐᒥᒃ ᐊᖏᖅᓯᒪᒋᐊᖃᕐᓂᕐᒥᒃ ᑲᑎᖅᓯᓂᕐᒧᑦ, ᐊᑐᕐᓂᕐᒧᑦ ᑕᑯᑎᑕᐅᓂᕐᒧᓪᓘᓐᓃᑦ ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᓂᒃ ᑖᒃᑯᓄᖓ ᒥᒃᓵᓄᑦ ᐱᔭᕆᐊᖃᕐᓂᐅᑉ ᐅᖓᑖᓄᑦ.

ᓈᒻᒪᑦᓯᐊᕐᓂᖏᑦ ᑕᑕᑎᕆᐊᓖᒃ ᐊᖏᖅᓯᒪᓂᕐᒧᑦ ᒪᓕᒃᑐᖅ ᖃᓄᐃᓐᓂᕐᒧᑦ ᐊᒻᒪ ᖃᓄᐃᑦᑑᖕᒪᖔᑦ ᑐᑭᓯᒋᐊᕈᑎᒃᓴᖅ ᑲᑎᖅᓱᖅᑕᐅᔪᖅ. ᐱᒻᒪᕆᐅᓂᖅᓴᐅᒍᓂ ᑐᑭᓯᒋᐊᕈᑎᒋᔭᐅᔪᑦ (ᐃᒫᑐᑦ ᐋᓐᓂᐊᖃᕐᓇᖏᑦᑐᓕᕆᔾᔪᑎᑦ ᐅᕝᕙᓘᓐᓃᑦ ᐃᕐᖃᓇᐃᔮᖓᓂᒃ ᖃᐅᔨᓴᖅᑕᐅᓃᑦ), ᓇᓗᓇᐃᖅᓯᒪᒻᒪᕆᖕᓂᖅᐹᒍᔭᕆᐊᖃᖅᑐᑦ ᑕᑕᑎᕆᐊᓕᒃ ᐊᖏᖅᓯᒪᓂᕐᒧᑦ ᐱᔭᕆᐊᖃᖅᑑᔪᖅ. ᐊᖏᖅᓯᒪᓂᖅ ᐱᔭᐅᓯᒪᓕᕈᓂ, ᑭᓇᑐᐃᓐᓇᐅᑉ ᓂᕆᐅᖕᓂᕆᔭᖓ ᐃᓱᒪᒃᓴᖅᓯᐅᕈᑎᒋᔭᐅᔭᕆᐊᖃᖅᑐᖅ. ᐊᖏᖅᓯᒪᔪᖅ ᐱᔭᐅᓂᐊᙱᑦᑐᖅ ᐅᐃᕕᕐᕆᓂᒃᑯᑦ.

ᑭᓇᑐᐃᓐᓇᖅ ᓴᑐᐃᔪᖕᓇᖅᑐᖅ ᐊᖏᖅᓯᒪᓂᖓᓂᒃ ᖃᖓᑐᐃᓐᓇᖅ, ᒪᓕᒡᓗᒍ ᒪᓕᒐᑎᒍᑦ ᐊᖏᖃᑎᒌᖕᓂᒃᑯᓪᓘᓐᓃᑦ ᑭᒡᓕᖏᑎᒍᑦ ᐊᒻᒪ ᓈᒻᒪᒃᑐᒥᒃ ᖃᐅᔨᒪᑎᑦᓯᓂᕐᒥᒃ. ᑭᓇᑐᐃᓐᓇᖅ ᖃᐅᔨᒪᑎᑕᐅᓛᖅᑐᖅ ᖃᓄᖅ ᐊᒃᑐᐃᓂᐊᕐᓂᖓᓂᒃ ᓴᑐᐃᓂᐊᕐᓂᕈᓂ.

ᒪᓕᒃᑕᐅᔾᔪᑎ 4: ᑲᑎᖅᓯᓂᕐᒥᒃ ᑭᒡᓕᖃᖅᑎᑦᓯᓂᖅ

ᑲᑎᖅᓱᐃᓂᖅ ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᓂᒃ ᑭᒡᓕᖃᓛᖅᑐᖅ ᐱᔭᐅᔭᕆᐊᖃᖅᑐᒧᑦ ᑭᓯᒥᒃ ᐱᔾᔪᑎᖃᕐᓗᑎᒃ ᓇᓗᓇᐃᖅᑕᐅᓯᒪᔪᓄᑦ Canadian North-ᒧᑦ. ᑐᑭᓯᒋᐊᕈᑎᒃᓴᑦ ᑲᑎᖅᓱᖅᑕᐅᓛᖅᑐᑦ ᓈᒻᒪᑦᓯᐊᖅᑐᒃᑯᑦ ᒪᓕᒐᑎᒎᑦᓯᐊᖅᑐᒃᑯᓪᓗ.

ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᑦ ᑲᑎᖅᓱᖅᑕᐅᔭᕆᐊᖃᖅᑐᑦ ᑲᒪᒋᔭᐅᑦᓯᐊᒻᒪᕆᒡᓗᑎᒃ. ᑕᒪᐃᑕ ᖃᓄᑎᒋᐅᓂᖓ ᐊᒻᒪ ᖃᓄᐃᑦᑑᓂᖓ ᑐᑭᓯᒋᐊᕈᑎᒃᓴᑦ ᖃᑎᖅᓱᖅᑕᐅᔪᑦ ᑭᒡᓕᖃᓛᖅᑐᑦ ᐱᔭᐅᔭᕆᐊᖃᖅᑐᒧᑦ ᑭᓯᒥᒃ ᑲᒪᒋᓂᐊᕐᓗᒋᑦ ᐱᔾᔪᑎᒃᓴᑦ ᓇᓗᓇᐃᖅᑕᐅᓯᒪᔪᑦ.

ᒪᓕᒃᑕᐅᔾᔪᑎ 5: ᑭᒡᓕᖃᖅᑎᑦᓯᓂᖅ ᐊᑐᖅᑕᐅᓂᕐᒥᒃ, ᑕᑯᑎᑕᐅᓂᕐᒥᒃ ᐊᒻᒪ ᐱᓯᒪᓂᕐᒥᒃ

ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᑦ ᐊᑐᖅᑕᐅᓂᐊᙱᓚᑦ ᑕᑯᑎᑕᐅᓂᐊᙱᓚᓪᓘᓐᓃᑦ ᐱᔾᔪᑎᖃᕐᓗᑎᒃ ᐊᓯᐊᓄᑦ ᐱᔾᔪᑕᐅᔪᓄᑦ ᑐᑭᓯᒋᐊᕈᑎᒃᓴᑦ ᓯᕗᓪᓕᕐᒥᒃ ᑲᑎᖅᓱᖅᑕᐅᓂᖏᑦ, ᑭᓯᐊᓂ ᐊᖏᖅᑕᐅᓯᒪᒍᓂ ᑭᒃᑯᑐᐃᓐᓇᕐᒧᑦ ᐅᕝᕙᓘᓐᓃᑦ ᐱᔭᐅᔭᕆᐊᖃᕈᓂ ᒪᓕᒐᑎᒍᑦ. ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᑦ ᐱᓯᒪᔭᐅᓛᖅᑐᖅ ᐱᓯᒪᔭᐅᔭᕆᐊᖃᕈᑎᒃ ᑭᓯᐊᓂ ᐱᔾᔪᑎᒋᔭᐅᔪᑦ ᑲᔪᓯᔪᖕᓇᑦᓯᐊᕐᓗᒋᑦ ᑭᓯᒥᒃ.

ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᑦ ᐱᔭᐅᔭᕆᐊᖃᕈᖕᓇᐃᖅᑐᑦ ᓇᓗᓇᐃᖅᑕᐅᓯᒪᔪᒧᑦ ᐱᔾᔪᑎᒧᑦ ᓱᕋᒃᑕᐅᔭᕆᐊᖃᖅᑐᑦ, ᓄᖑᑎᖅᑕᐅᔭᕆᐊᖃᖅᑐᑦ ᐅᕝᕙᓘᓐᓃᑦ ᑭᓇᐅᓂᖏᑦ ᖃᐅᔨᒪᔭᐅᔪᖕᓇᐃᖅᑎᓪᓗᒋᑦ.

ᐱᔾᔪᑎᒋᔭᐅᖃᑕᐅᑎᖢᓂ Canadian North-ᑯᑦ ᑲᑎᖅᓱᐃᓂᖓᓐᓂᒃ, ᐊᑐᕐᓂᖓᓐᓂᒃ ᐊᒻᒪ/ᐅᕝᕙᓘᓐᓃᑦ ᑕᑯᑎᑦᓯᓂᖓᓐᓂᒃ ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᓂᒃ ᐊᐅᓚᑦᓯᓂᕐᒥᒃ ᑎᖕᒥᓲᓕᕆᓂᖓᓄᑦ, ᖃᖓᑐᐃᓐᓇᖅ ᓄᑖᒧᑦ ᑎᖕᒥᓲᓕᕆᔨᕐᒧᑦ ᓂᐅᕕᖅᑕᐅᓂᕈᑎᒃ Canadian North-ᑯᑦ ᐱᖁᑎᖏᑦ ᐃᓚᖏᑦ ᑕᒪᐃᑕᓘᓐᓃᑦ, ᑕᒪᐃᑕ ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᑦ, ᐅᕝᕙᓘᓐᓃᑦ ᐃᓚᖓᑦ ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᑦ ᐃᓚᒋᔭᐅᔪᑦ ᐱᖁᑎᓄᑦ ᓂᐅᕕᖅᑕᐅᔪᓄᑦ, ᓅᑕᐅᓂᐊᖅᑐᑦ (ᑕᑯᑎᑕᐅᓗᑎᒃ) ᓄᑖᒧᑦ ᑎᖕᒥᓲᓕᕆᔨᒧᑦ, ᒪᓕᒋᐊᖃᕐᓗᑎᒃ ᓇᓗᓇᐃᖅᓯᒪᔪᓂᒃ ᖃᓄᐃᒋᐊᖃᕐᓂᐅᔪᓂᒃ. ᓄᑖᖅ ᑎᖕᒥᓲᓕᕆᔨ ᐊᖏᕆᐊᖃᕐᓗᓂ ᐋᕐᖀᓯᒪᓗᓂ ᒪᓕᒡᓗᓂᓗ Canadian North-ᑯᑦ ᑕᑯᑎᑕᐅᔭᕆᐊᖃᙱᓂᕐᒧᑦ ᐊᑐᐊᒐᖏᓐᓂᒃ ᐊᓪᓕᖅᐹᒥᒃ 6 ᑕᕐᕿᕐᓄᑦ, ᐅᕝᕙᓘᓐᓃᑦ ᓄᑖᖅ ᑎᖕᒥᓲᓕᕆᔨ ᐊᖏᕆᐊᖃᕐᓗᓂ Canadian North¬-ᒧᑦ ᖃᐅᔨᒪᑎᑦᓯᓂᕐᒥᒃ ᐊᐅᓪᓚᐃᓂᕐᒥᒃ ᓂᐅᕕᖅᑎᒋᔭᓕᒫᖏᓐᓄᑦ ᐅᖃᐅᔾᔪᕐᓗᓂᒋᑦ ᓅᑎᕆᔭᐅᔪᒪᓂᐅᔪᒥᒃ, ᓄᑖᕐᒧᑦ ᑎᖕᒥᓲᓕᕆᔨᐅᑉ ᑕᑯᑎᑕᐅᔭᕆᐊᖃᙱᓂᕐᒧᑦ ᐊᑐᐊᒐᖓᓄᑦ ᐊᒻᒪ ᑐᓂᓗᓂᒋᑦ ᓄᐊᕕᖅᑎᒋᔭᖏᑦ ᐊᔪᕐᓇᖏᑦᑐᕐᒥᒃ ᓱᕚᓪᓕᕐᓇᖅᑐᒥᒡᓗ ᐲᖅᓯᓂᕐᒥᒃ ᓇᖕᒥᓂᖅ ᑐᑭᓯᒋᐊᕈᑎᒋᔭᖏᓐᓂᒃ ᓅᑕᐅᓂᕐᒥᒃ, Canadian North ᐱᔪᒪᔭᖓᓂᒃ.

ᒪᓕᒃᑕᐅᔾᔪᑎ 6: ᑕᒻᒪᖅᓯᒪᙱᑦᓯᐊᕐᓂᖅ

ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᑦ ᑕᒻᒪᖅᓯᒪᙱᑦᓯᐊᕐᓂᐊᖅᐳᑦ, ᐱᔭᕇᖅᓯᒪᑦᓯᐊᕐᓗᑎᒃ ᓄᑖᙳᖅᑎᓯᒪᑦᓯᐊᕐᓗᑎᒡᓗ ᐱᔭᕆᐊᖃᖅᑑᖕᒪᑦ ᐊᑐᖅᑕᐅᔾᔪᑎᖏᓐᓄᑦ.

ᑕᒪᓐᓇ ᐱᒻᒪᕆᐅᓗᐊᖅᑐᖅ ᑐᑭᓯᒋᐊᕈᑎᒃᓴᑦ ᐊᑐᖅᑕᐅᔪᑦ ᖃᐅᔨᓴᕈᑕᐅᖕᒪᑕ ᑭᓇᑐᐃᓐᓇᕐᒥᒃ, ᐃᒫᑐᑦ ᐊᖏᖅᑕᐅᓂᕐᒥᒃ ᐊᑮᑦᑐᓕᔪᖕᓇᕐᓂᕐᒥᒃ. ᖃᓄᑎᒋ ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᑦ ᑕᒻᒪᖅᓯᒪᙱᑦᓯᐊᕐᓂᖏᑦ, ᐱᔭᕇᖅᓯᒪᑦᓯᐊᕐᓂᖏᑦ ᐊᒻᒪ ᓄᑖᙳᖅᑎᓯᒪᑦᓯᐊᕐᓂᖏᑦ ᒪᓕᖕᓂᐊᖅᑐᑦ ᑐᑭᓯᒋᐊᕈᑎᒃᓴᑦ ᐊᑐᖅᑕᐅᓂᖏᓐᓂᒃ ᐃᓱᒪᒃᓴᖅᓯᐅᕈᑎᒋᓗᒍ ᑭᓇᑐᐃᓐᓇᐅᑉ ᐱᔪᒪᓂᕆᔭᖓ.

ᓇᖕᒥᓂᖅ ᑐᑭᓯᒋᐊᕈᑎᒃᓴᑦ ᐊᑐᖅᑕᐅᒐᔪᒃᑐᑦ, ᐃᓚᒋᓗᒍ ᑐᑭᓯᒋᐊᕈᑎᒃᓴᑦ ᑕᑯᑎᑕᐅᕙᒃᑐᑦ ᐊᓯᖏᓐᓄᑦ, ᑕᒻᒪᖅᓯᒪᙱᑦᓯᐊᕆᐊᖃᖅᐸᒃᑐᑦ ᓄᑖᙳᖅᑎᓯᒪᑦᓯᐊᕐᓗᑎᒡᓗ.

ᒪᓕᒃᑕᐅᔾᔪᑎ 7: ᓴᐳᒻᒥᔾᔪᑏᑦ

ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᑦ ᓴᐳᒻᒥᔭᐅᓂᐊᖅᑐᑦ ᓴᐳᒻᒥᔾᔪᑎᓂᒃ ᐊᑐᕐᓗᑎᒃ ᓈᒻᒪᒃᑐᑦ ᑐᑭᓯᒋᐊᕈᑎᒃᓴᑦ ᐱᒻᒪᕆᐅᓂᖏᓐᓄᑦ.

ᓴᐳᒻᒥᓂᕐᒧᑦ ᐊᑐᖅᑕᐅᔪᑦ ᓴᐳᒻᒥᓂᐊᖅᑐᖅ ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᓂᒃ ᔭᒐᑦᑕᐃᓕᑎᓪᓗᒋᑦ ᑎᒡᓕᒃᑕᐅᑦᑕᐃᓕᓗᑎᒡᓗ, ᐊᒻᒪᓗ ᐊᖏᖅᑕᐅᓯᒪᙱᑐᓄᑦ ᐊᑐᐃᓐᓇᕆᔭᐅᖁᓇᒋᑦ, ᑕᑯᔭᐅᖁᓇᒋᑦ, ᐊᒥᓱᓕᐊᕆᔭᐅᖁᓇᒋᑦ, ᐊᑐᖅᑕᐅᖁᓇᒋᑦ ᐅᕝᕙᓘᓐᓃᑦ ᐊᓯᔾᔨᖅᑕᐅᖁᓇᒋᑦ. ᖃᓄᐃᑦᑑᓂᖏᑦ ᓴᐳᒻᒥᔾᔪᑎᑦ ᐊᔾᔨᒌᓚᙱᑦᑐᑦ ᒪᓕᒡᓗᑎᒃ ᖃᓄᑎᒋᑦ ᑐᑭᓯᒋᐊᕈᑎᒃᓴᑦ ᐱᒻᒪᕆᐅᑎᒋᓂᖏᑦ.

ᖃᓄᖅ ᓴᐳᒻᒥᓂᐅᔪᑦ ᐃᓚᖃᕐᓂᐊᖅᑐᑦ ᐱᖁᑎᑎᒍᑦ, ᐋᕐᕿᒃᓱᖅᓯᒪᓂᑎᒍᑦ ᐊᒻᒪ ᖃᕆᑕᐅᔭᕐᒨᓕᖓᔪᑎᒍᑦ. ᑕᒪᐃᑕ ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᑦ ᑲᒪᒋᔭᐅᓛᖅᑐᑦ ᖃᐅᔨᒪᔭᐅᔭᕆᐊᖃᕌᖓᑕ ᐊᒻᒪ ᑕᒪᐃᑕ Canadian North-ᑯᓐᓄᑦ ᐃᓚᒋᔭᐅᔪᑦ ᑲᒪᒋᔭᖃᓛᖅᑐᑦ ᓴᐳᒻᒥᓂᕐᒥᒃ ᓇᖕᒥᓂᖅ ᑐᑭᓯᒋᐊᕈᑎᒋᔭᖏᓐᓂᒃ ᐊᑐᖅᑕᐅᕙᒃᑐᑦ ᐃᕐᖃᓇᐃᔮᒥᖕᓂᒃ.

Canadian North ᐃᓚᒋᔭᓕᒫᖁᑎᖏᓐᓂᒃ ᖃᐅᔨᒪᑎᑦᓯᒐᔪᖕᓂᐊᖅᑐᖅ ᐱᒻᒪᕆᐅᓂᖓᑕ ᐋᕐᖀᓯᒪᓂᕐᒥᒃ ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᕐᓂᒃ ᓴᐳᒻᒥᑦᓯᐊᕐᓂᕐᒥᒃ. ᑲᒪᑦᓯᐊᕐᓗᑎᒡᓗ ᓄᖑᑎᕆᔭᕌᖓᒥᒃ ᓱᕈᖅᑎᕆᔭᕌᖓᒥᒡᓗ ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᕐᓂᒃ ᐊᖏᖅᑕᐅᓯᒪᙱᑦᑐᑦ ᑭᑐᑐᐃᓐᓇᐃᑦ ᐊᑐᐃᓐᓇᖃᖁᓇᒋᑦ ᑐᑭᓯᒋᐊᕈᑎᒃᓴᓄᑦ.

ᒪᓕᒃᑕᐅᔾᔪᑎ 8: ᒪᑐᐃᖓᓂᖅ

Canadian North ᐊᑐᐃᓐᓇᐅᑎᑦᓯᑲᐅᑎᒋᔭᕆᐊᖃᖅᑐᖅ ᑭᒃᑯᑐᐃᓐᓇᕐᓄᑦ ᓇᓗᓇᐃᖅᓯᒪᔪᓂᒃ ᑐᑭᓯᒋᐊᕈᑎᓂᒃ ᐊᑐᐊᒐᖏᑦᑕ ᐊᑐᖅᐸᒃᑕᖏᑦᑕᓗ ᒥᒃᓵᓄᑦ ᐱᔾᔪᑎᖃᖅᑐᓂᒃ ᐊᐅᓚᑦᓯᓂᕐᒥᒃ ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᕐᓂᒃ.

Canadian North ᒪᑐᐃᖓᔭᕆᐊᖃᖅᑐᖅ ᐊᑐᐊᒐᖏᑦᑕ ᐊᑐᖅᐸᒃᑕᖏᑦᑕᓗ ᒥᒃᓵᓄᑦ ᐱᔾᔪᑎᖃᕐᓗᓂ ᐊᐅᓚᑦᓯᓂᕐᒥᒃ ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᓂᒃ. ᑭᒃᑯᑐᐃᓐᓇᐃᑦ ᐱᔪᖕᓇᕐᓂᐊᖅᑐᖅ ᑐᑭᓯᒋᐊᕈᑎᒃᓴᓂᒃ Canadian North ᐊᑐᐊᒐᖏᑦᑕ ᐊᑐᖅᐸᒃᑕᖏᑦᑕᓗ ᒥᒃᓵᓄᑦ ᐊᒃᓱᕈᓗᐊᙱᓗᑎᒃ. ᑖᓐᓇ ᑐᑭᓯᒋᐊᕈᑎᒃᓴᖅ ᐊᑐᐃᓐᓇᐅᑎᑕᐅᓛᖅᑐᖅ ᑐᑭᓯᐊᓐᓇᖅᑎᒋᐊᕐᓗᒍ.

ᑐᑭᓯᒋᐊᕈᑎᒃᓴᖅ ᐊᑐᐃᓐᓇᐅᑎᑕᐅᔪᖅ ᐃᓚᖃᕆᐊᖃᖅᑐᖅ ᒪᑯᓂᖓ:

  • ᖃᓄᖅ ᑭᓇᑐᐃᓐᓇᖅ ᖃᐅᔨᒋᐊᕈᖕᓇᕐᒪᖔᑦ ᑕᑯᑎᑕᐅᔭᕆᐊᖃᙱᓂᕐᒥᒃ ᒪᓕᖕᓂᕐᒥᒃ ᐊᐅᓚᑦᓯᔨᒥᒃ ᐱᔾᔪᑎᖃᕐᓗᓂ ᐊᑲᐅᙱᓕᐅᕈᑎᖃᕈᓂ ᐅᕝᕙᓘᓐᓃᑦ ᖃᐅᔨᒋᐊᕈᒪᒍᓂ;
  • ᐅᖃᐅᔾᔪᐃᓂᖅ ᑭᓇᑐᐃᓐᓇᖅ ᐊᑐᐃᓐᓇᖃᕈᖕᓇᕐᒪᑦ ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᕐᓂᒃ ᐱᓯᒪᔭᐅᔪᓂᒃ Canadian North-ᑯᓐᓄᑦ ᑎᑎᕋᕐᕕᒋᓗᒍ ᑕᑯᑎᑕᐅᔭᕆᐊᖃᙱᓂᕐᒥᒃ ᒪᓕᖕᓂᕐᒥᒃ ᐊᐅᓚᑦᓯᔨ, ᓇᓗᓇᐃᑦᓯᐊᕐᓗᒍ ᑭᓇᐅᓂᖓᓂᒃ, ᐊᒻᒪ ᐱᔪᒪᓗᓂ ᓇᓗᓇᐃᖅᓯᒪᔪᒥᒃ ᑐᑭᓯᒋᐊᕈᑎᒥᒃ;
  • ᐅᓂᒃᑳᖅᓯᒪᔪᒥᒃ ᖃᓄᐃᑦᑐᓂᒃ ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᕐᓂᒃ Canadian North-ᑯᑦ ᐱᓯᒪᖕᒪᖔᑖ ᐃᓚᒋᓗᒍ ᖃᓄᖅ ᐊᑐᖅᑕᐅᕙᖕᒪᖔᑖ;
  • ᐊᔾᔨᖓᓂᒃ ᕿᒥᕐᕈᐊᕐᒥᒃ ᐅᕝᕙᓘᓐᓃᑦ ᐊᓯᖏᑦ ᑐᑭᓯᒋᐊᕈᑎᒃᓴᑦ ᐅᓂᒃᑳᖅᑐᑦ Canadian North ᐊᑐᐊᒐᖏᓐᓂᒃ, ᐊᙳᑎᒋᐊᓕᖏᓐᓂᒃ ᐅᕝᕙᓘᓐᓃᑦ ᓇᓗᓇᐃᒃᑯᑕᖏᓐᓂᒃ; ᐊᒻᒪ
  • ᑭᓱᑦ ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᑦ ᐊᑐᐃᓐᓇᐅᑎᑕᐅᕙᖕᒪᖔᑖ ᐃᓚᒋᔭᖏᑎᑐᑦ ᑎᒥᐅᔪᓄᑦ.

ᑖᓐᓇ ᑐᑭᓯᒋᐊᕈᑎᒃᓴᖅ ᐊᑐᐃᓐᓇᐅᑎᑕᐅᖕᒥᔪᖅ ᖃᕆᑕᐅᔭᖃᕐᕕᖕᒥᑦ.

ᒪᓕᒃᑕᐅᔾᔪᑎ 9: ᑭᓇᑐᐃᓐᓇᖅ ᐊᑐᐃᓐᓇᖃᕐᓂᖅ

ᐱᔪᒪᓂᕋᕈᓂ, ᑭᓇᑐᐃᓐᓇᖅ ᖃᐅᔨᒪᑎᑕᐅᓛᖅᑐᖅ ᑕᐃᒪᐅᓂᖓᓂᒃ, ᐊᑐᕐᓂᖓᓂᒃ ᐊᒻᒪ ᑕᑯᑎᑕᐅᓂᖓᓂᒃ ᓇᖕᒥᓂᖅ ᑐᑭᓯᒋᐊᕈᑎᒋᔭᖏᓐᓂᒃ ᐊᒻᒪ ᐊᑐᐃᓐᓇᐅᑎᑕᐅᓛᖅᑐᖅ ᑕᐃᒃᑯᓄᖓ ᑐᑭᓯᒋᐊᕈᑎᓄᑦ. ᑭᓇᑐᐃᓐᓇᖅ ᖃᐅᔨᓴᑦᓯᐊᕈᖕᓇᓛᖅᑐᖅ ᑕᒻᒪᖅᓯᒪᙱᑦᓯᐊᕐᓂᖏᑦᑕ ᐱᔭᕇᖅᓯᒪᑦᓯᐊᕐᓂᖏᑦᑕᓗ ᑐᑭᓯᒋᐊᕈᑎᖏᓐᓂᒃ ᐊᒻᒪ ᐊᓯᔾᔨᖅᑕᐅᓗᓂ ᓈᒻᒪᒃᑯᓂ.

ᑭᓇᑐᐃᓐᓇᖅ ᐊᑐᐃᓐᓇᖃᖅᑎᑕᐅᕐᖄᖅᑎᓐᓇᓂ ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᓂᒃ, Canadian North-ᑯᓐᓄᑦ ᐃᓚᒋᔭᐅᔪᖅ ᖃᐅᔨᒋᐊᕆᐊᖃᖅᑐᖅ ᑕᑯᑎᑕᐅᔭᕆᐊᖃᙱᓂᕐᒥᒃ ᒪᓕᖕᓂᕐᒥᒃ ᐊᐅᓚᑦᓯᔨᒥᒃ ᐅᕝᕙᓘᓐᓃᑦ ᑖᑉᓱᒪ ᑎᒃᑯᐊᖅᓯᒪᔭᖓ. ᑭᒡᓕᒃᑕᖃᖅᑐᖅ ᐊᑐᐃᓐᓇᐅᑎᑦᓯᓂᕐᒥᒃ ᐃᓗᐊᓂᑦ PIPEDA ᑕᑯᑎᑦᓯᓂᖃᕌᖓᑦ ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᕐᓂᒃ ᐱᔪᒪᔪᒧᑦ ᑭᓇᑐᐃᓐᓇᕐᒧᑦ ᒥᒃᓵᓄᑦ ᐊᓯᐊᑕ ᐲᖅᑕᐅᔪᖕᓇᖏᑦᑐᖅ ᑐᑭᓯᒋᐊᕈᑎᒥᒃ ᑭᓇᑐᐃᓐᓇᐅᑉ ᒥᒃᓵᓄᑦ, ᐊᒻᒪ ᐃᓚᖏᓐᓂᒃ ᓇᓗᓇᐃᖅᑕᐅᓯᒪᔪᓂᒃ ᖃᓄᐃᓐᓂᐅᔪᓂᒃ ᖃᐅᔨᒪᑎᑕᐅᓂᖃᕆᐊᖃᖅᑐᖅ ᒐᕙᒪᒃᑯᑦ ᐃᓕᓯᒪᔭᖏᓐᓂᒃ ᑕᑯᑎᑕᐅᕐᖄᖅᑎᓐᓇᒋᑦ.

ᐊᑐᐃᓐᓇᐅᑎᑕᐅᓂᖅ ᐊᔪᖅᑎᑕᐅᔪᖕᓇᕐᒥᔪᖅ ᑐᑭᓯᒋᐊᕈᑎᒃᓴᑦ ᓴᐳᒻᒥᔭᐅᓯᒪᒍᓂ ᑐᒃᓯᕋᖅᑎ-ᐱᔨᑦᓯᖅᑕᐅᔪᖅ ᐱᔪᖕᓇᐅᑎᖏᓐᓄᑦ; ᑕᑯᑎᑦᓯᓂᖅ ᑐᑭᓯᒋᐊᕈᑎᓂᒃ ᑕᑯᑎᑦᓯᖃᑕᐅᓇᔭᕐᓂᖅᐸᑦ ᑮᓇᐅᔾᔭᒃᓴᕐᓂᓕᕆᓂᕐᒧᑦ ᑕᑯᑎᑕᐅᔭᕆᐊᖃᙱᑐᕐᓂᒃ ᑐᑭᓯᒋᐊᕈᑎᒃᓴᓂᒃ; ᑕᑯᑎᑦᓯᓂᖅ ᑐᑭᓯᒋᐊᕈᑎᒃᓴᓂᒃ ᐅᓗᕆᐊᓇᖅᑐᒦᑎᑦᓯᓕᕈᓂ ᐃᓅᓯᕐᒥᒃ ᐅᕝᕙᓘᓐᓃᑦ ᓴᐳᒻᒥᓂᕐᒥᒃ ᐊᓯᐊᓂᒃ ᑭᓇᑐᐃᓐᓇᕐᒥᒃ; ᑐᑭᓯᒋᐊᕈᑎᒃᓴᑦ ᑲᑎᖅᓱᖅᑕᐅᓚᐅᕐᓂᕈᓂᖅ ᖃᐅᔨᓴᕐᓂᖃᖅᑎᓪᓗᒋᑦ ᓯᖁᒥᑦᓯᔪᒃᓴᒥᒃ ᐊᖏᖃᑎᒌᒍᑎᒥᒃ ᐅᕝᕙᓘᓐᓃᑦ ᓯᖁᒥᑦᓯᔪᒃᓴᒥᒃ ᑲᓇᑕᐅᑉ ᐅᕝᕙᓘᓐᓃᑦ ᐊᕕᒃᑐᖅᓯᒪᓂᕐᔪᐊᑉ ᒪᓕᒐᖏᓐᓂᒃ ᓂᕆᐅᒋᔭᐅᓂᖃᕈᓂ ᖃᐅᔨᒪᓂᖓ ᐅᕝᕙᓘᓐᓃᑦ ᐊᖏᖅᓯᒪᓂᖓ ᑭᓇᑐᐃᓐᓇᐅᑉ ᐊᑲᐅᙱᓕᐅᕈᑎᓕᐅᕋᔭᕐᓂᖅᐸᑦ ᐊᑐᐃᓐᓇᐅᑎᑦᓯᓂᕐᒥᒃ ᐅᕝᕙᓘᓐᓃᑦ ᑕᒻᒪᖅᓯᒪᙱᑦᓯᐊᕐᓂᖓᑕ ᑐᑭᓯᒋᐊᕈᑎᒃᓴᑦ; ᐅᕝᕙᓘᓐᓃᑦ ᑐᑭᓯᒋᐊᕈᑎᒃᓴᑦ ᓴᕐᕿᑎᑕᐅᓚᐅᕐᓂᕈᑎᒃ ᐋᕐᕿᒃᓯᒪᒻᒪᕆᒃᑐᒃᑯᑦ ᐊᖏᖃᑎᒌᙱᑐᓕᕆᓂᒃᑯᑦ ᐋᕐᕿᒃᓯᒐᓱᖕᓂᕐᒥᒃ.

ᐊᐱᕆᔭᐅᒍᓂ, Canadian North ᖃᐅᔨᑎᑦᓯᓛᖅᑐᖅ ᑭᓇᑐᐃᓐᓇᕐᒥᒃ ᑖᒃᑯᐊ Canadian North-ᑯᑦ ᐱᓯᒪᖕᒪᖔᑖ ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᓂᒃ ᑖᑉᓱᒪ ᑭᓇᑐᐃᓐᓇᐅᑉ ᒥᒃᓵᓄᑦ. ᑕᑯᑎᑕᐅᒍᓂ ᑭᓇᑐᐃᓐᓇᖅ, ᑎᖕᒥᓲᓕᕆᔨᒃᑯᑦ ᑐᓂᓯᓂᐊᖅᑐᑦ ᖃᓄᖅ ᐊᑐᖅᑕᐅᓯᒪᖕᒪᖔᑖ ᐊᑐᖅᑕᐅᖕᒪᖔᑕᓘᓐᓃᑦ ᑐᑭᓯᒋᐊᕈᑎᒋᔭᐅᔪᑦ ᐊᒻᒪ ᐊᓯᖏᓐᓄ ᑖᓐᑯ ᑐᑭᓯᒋᐊᕈᑎᒋᔭᐅᔪᑦ ᑕᑯᑎᑕᐅᓂᑰᔪᓂᒃ.

ᐊᑐᐃᓐᓇᐅᑎᑕᐅᔪᒪᓂᖅ ᐱᔾᔪᑎᖃᖅᑐᖅ ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᓂᒃ ᑲᑎᖅᓱᐃᓂᕐᒥᒃ, ᐊᑐᕐᓂᕐᒥᒃ ᐅᕝᕙᓘᓐᓃᑦ ᑕᑯᑎᑕᐅᓂᕐᒥᒃ ᐱᔨᑦᓯᕋᖅᑕᐅᓂᖓᓂᒃ ᓂᐅᕕᖅᑎᐅᔪᖅ, ᓂᐅᕕᖅᑎᐅᔪᖅ ᑐᓂᔭᐅᑲᐅᑎᒋᓛᖅᑐᖅ ᑐᒃᓯᕋᕐᓂᐅᑉ ᐊᔾᔨᖓᓂᒃ.

Canadian North ᑭᐅᓛᖅᑐᖅ ᑭᓇᑐᐃᓐᓇᐅᑉ ᐱᔪᒪᓂᖓᓄᑦ 30 ᐅᓪᓗᑦ ᐃᓗᐊᓂᑦ ᐊᒻᒪ ᐊᓪᓕᖅᐹᒥᒃ ᐊᑭᖃᕐᓗᓂ ᐅᕝᕙᓘᓐᓃᑦ ᐊᑭᖃᙱᒻᒪᕆᒡᓗᓂ ᐱᔪᒪᔪᒧᑦ. Canadian North ᐱᔭᕆᐊᖃᕈᖕᓇᖅᑐᖅ ᓈᒻᒪᒃᑐᒥᒃ ᐊᑭᓕᖅᑕᐅᓂᕐᒥᒃ ᑐᓂᓯᓂᕐᒥᒃ ᑐᑭᓯᒋᐊᕈᑎᓂᒃ ᑭᓯᐊᓂ ᓯᕗᓂᐊᒍᑦ ᖃᐅᔨᒪᑎᑦᓯᓂᕈᓂ ᑭᓇᑐᐃᓐᓇᕐᒥᒃ ᖃᓄᑎᒋ ᐊᑭᖃᓛᕐᒪᖔᑦ ᐊᒻᒪ ᑭᓇᑐᐃᓐᓇᖅ ᖃᐅᔨᒪᑎᑦᓯᓯᒪᓪᓗᓂ Canadian North-ᒥᒃ ᐱᔪᒪᓂᖅ ᑲᔪᓯᖁᔭᐅᓗᓂ.

ᑭᓇᑐᐃᓐᓇᖅ ᑕᑯᑎᑦᓯᑦᓯᐊᖅᓯᒪᓕᕈᓂ ᑕᒻᒪᖅᓯᒪᓂᐅᔪᒥᒃ ᐅᕝᕙᓘᓐᓃᑦ ᐱᔭᕇᖅᓯᒪᙱᓂᐅᔪᒥᒃ ᓇᖕᒥᓂᖅ ᑐᑭᓯᒋᐊᕈᑎᒋᔭᖏᓐᓂᒃ, Canadian North ᐋᕐᕿᒃᓯᔭᕆᐊᖃᖅᑐᖅ ᑐᑭᓯᒋᐊᕈᑎᒃᓴᒥᒃ ᐱᔭᕆᐊᖃᖅᑕᒥᑎᒍᑦ. ᖃᓄᐃᑦᑑᓂᖓ ᑐᑭᓯᒋᐊᕈᑎᒃᓴᖅ ᐋᕐᕿᒃᑕᐅᖁᓯᒪᔪᖅ ᒪᓕᒡᓗᒍ, ᐊᓯᔾᔨᖅᑎᕆᓂᖅ ᐃᓚᖃᕈᖕᓇᖅᑐᖅ ᐋᕐᕿᒃᓯᓂᕐᒥᒃ, ᐲᖅᓯᓂᕐᒥᒃ ᐅᕝᕙᓘᓐᓃᑦ ᐃᓚᓯᓂᕐᒥᒃ ᑐᑭᓯᒋᐊᕈᑎᓂᒃ. ᓈᒻᒪᒃᑯᓂ, ᐊᓯᔾᔨᖅᑕᐅᓯᒪᔪᖅ ᑐᑭᓯᒋᐊᕈᑎ ᑐᓂᔭᐅᓛᖅᑐᖅ ᐊᓯᖏᓐᓄᑦ ᐊᑐᐃᓐᓇᖃᖅᑐᓂᒃ ᑐᑭᓯᒋᐊᕈᑎᒃᓴᓂᒃ ᑲᒪᒋᔭᐅᔪᒥᒃ.

ᐋᕐᕿᒋᐊᖅᑕᐅᖁᓯᒪᔪᖅ ᐋᕐᕿᒃᑕᐅᓯᒪᙱᒃᑯᓂ ᓂᐅᕕᖅᑎᐅᑉ ᖁᕕᐊᒋᔭᖓᓄᑦ, ᑭᓲᓂᖓ ᐋᕐᕿᒃᓯᒪᙱᑦᑐᖅ ᐋᕐᕿᒋᐊᖁᔭᐅᓯᒪᔪᖅ ᑎᑎᕋᖅᑕᐅᓛᖅᑐᖅ Canadian North ᐃᓚᒋᔭᖓᓄᑦ. ᓈᒻᒪᒃᑯᓂ, ᐋᕐᕿᒋᐊᖁᔭᐅᓯᒪᔪᒥᒃ ᐋᕐᕿᒋᐊᖅᓯᒪᙱᓂᖅᑕᖃᕈᓂ ᖃᐅᔨᒪᔭᐅᑎᑕᐅᔭᕆᐊᖃᖅᑐᑦ ᐊᓯᖏᑦ ᐊᑐᐃᓐᓇᖃᖅᑐᑦ ᑐᑭᓯᒋᐊᕈᑎᒃᓴᓂᒃ ᑲᒪᒋᔭᐅᔪᕐᒥᒃ.

ᒪᓕᒃᑕᐅᔾᔪᑎ 10: ᐋᕐᕿᒋᐊᕈᔨᓂᕐᒥᒃ ᒪᓕᒋᐊᓕᒃ

ᑭᓇᑐᐃᓐᓇᖅ ᑲᒪᒋᔭᖃᖅᑎᑦᓯᔪᖕᓇᖅᑐᖅ ᐋᕐᕿᒋᐊᖁᔨᓂᕐᒥᒃ ᐱᔾᔪᑎᖃᕐᓗᓂ ᒪᓕᖕᓂᕐᒥᒃ ᖁᓛᓂᑦ ᑕᑯᑎᑕᐅᔭᕆᐊᖃᙱᓂᕐᒧᑦ ᒪᓕᒃᑕᐅᔾᔪᑎᓂᒃ ᐅᕗᖓ ᑕᑯᑎᑕᐅᔭᕆᐊᖃᙱᓂᕐᒥᒃ ᒪᖕᓂᕐᒥᒃ ᐊᐅᓚᑦᓯᔨᒧᑦ.

ᑕᐃᖕᓇ ᑲᒪᓲᑎᖃᖅᑐᖅ Canadian North ᒪᓕᒋᐊᖃᕐᓂᖓᓂᒃ ᑖᓐᓇᐅᔪᖅ ᑕᑯᑎᑕᐅᔭᕆᐊᖃᙱᓂᓕᕆᔨ ᑎᒃᑯᐊᖅᑕᐅᓯᒪᓪᓗᓂ ᑕᑯᑎᑕᐅᔭᕆᐊᖃᙱᓂᓕᕆᓂᕐᒧᑦ ᑲᑎᒪᔨᐊᓛᓄᑦ ᐃᓛᓐᓂᒃᑯᑦ. ᑕᑯᑎᑕᐅᔭᕆᐊᖃᙱᓂᓕᕆᓂᕐᒧᑦ ᑲᑎᒪᔨᐊᓛᑦ ᐃᓕᓯᓂᐊᖅᑐᖅ ᐊᑐᖅᑕᐅᔭᕆᐊᖃᖅᑐᓂᒃ ᑐᓂᔭᐅᓂᕐᒥᒃ ᑭᐅᓂᕐᒥᒡᓗ ᐊᑲᐅᒃᓴᖏᓐᓂᕋᖅᑕᐅᔪᓂᒃ ᐅᕝᕙᓘᓐᓃᑦ ᖃᐅᔨᒋᐊᕐᓂᐅᔪᓂᒃ Canadian North ᐊᑐᐊᒐᖏᑦᑕ ᐊᑐᖅᐸᒃᑕᖏᑦᑕᓗ ᒥᒃᓵᓄᑦ ᐱᔾᔪᑎᖃᕐᓗᑎᒃ ᑲᒪᒋᔭᖃᕐᓂᕐᒥᒃ ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᕐᓂᒃ.

Canadian North-ᑯᓐᓄᑦ ᐃᓚᒋᔭᐅᔪᑦ ᖃᐅᔨᒪᑎᑦᓯᓛᖅᑐᑦ ᑭᓇᑐᐃᓐᓇᕐᒥᒃ ᖃᐅᔨᒋᐊᖅᓯᒪᔪᙵᒃ ᐅᕝᕙᓘᓐᓃᑦ ᐊᑲᐅᒃᓴᖏᓐᓂᕋᕈᑎᓕᐅᖅᑐᓂᒃ ᐱᑕᖃᕐᓂᖓᓂᒃ ᐊᑐᖅᑐᓂᒃ ᐊᑲᐅᒃᓴᖏᓐᓂᕋᓕᕆᓂᕐᒥᒃ Canadian North-ᑯᓐᓂᑦ. ᐊᑲᐅᒃᓴᖏᓐᓂᕋᖅᑕᐅᔪᖅ ᓱᓕᓂᖓ ᖃᐅᔨᒪᔭᐅᓕᕐᓂᕈᓂ ᐃᓗᐊᒍ ᓯᓚᑖᒍᓘᓐᓃᑦ ᐊᑲᐅᒃᓴᖏᓐᓂᕋᖅᑕᐅᔪᓂᒃ ᖃᐅᔨᓴᕐᓂᒃᑯᑦ, Canadian North ᓈᒻᒪᒃᑐᓂᒃ ᐱᓕᕆᒋᐊᕐᓂᐊᖅᑐᖅ, ᐃᓚᒋᓗᒍ ᐊᓯᔾᔨᖅᑎᕆᓂᕐᒥᒃ ᐊᑐᐊᒐᖏᓐᓂᒃ ᐊᑐᖅᐸᒃᑕᖏᓐᓂᒡᓗ ᐱᔭᕆᐊᖃᕈᓂ.

ᐊᑲᐅᒃᓴᖏᓐᓂᕋᖅᑕᐅᔪᖅ ᐱᔾᔪᑎᖃᖅᑐᒥᒃ ᐱᔨᑦᓯᕋᖅᑕᐅᔫᑉ ᒥᒃᓵᓄᑦ, ᐱᔨᑦᓯᕋᖅᑕᐅᔪᖅ ᖃᐅᔨᒪᑎᑕᐅᑲᐅᑎᒋᓛᖅᑐᖅ.

ᐊᓯᔾᔨᕐᓂᐅᔪᑦ

ᖃᑯᑎᒃᑯᑦ ᑕᑯᑎᑕᐅᔭᕆᐊᖃᙱᓂᓕᕆᓂᕐᒧᑦ ᑲᑎᒪᔨᐊᓛᑦ ᐊᓯᔾᔨᖅᑎᕆᔪᖕᓇᖅᑐᑦ ᑕᒡᕗᖓ ᐊᑐᐊᒐᕐᒧᑦ ᒪᓕᑦᓯᐊᖅᑎᒐᓱᒡᓗᒍ ᑎᖕᒥᓲᓕᕆᓂᕐᒥᒃ ᐊᓯᔾᔨᖅᐸᓪᓕᐊᓂᐅᔪᓂᒃ ᐊᒻᒪ ᐊᓯᖏᓐᓄᑦ ᐱᔾᔪᑎᖃᕐᓗᑎᒃ. ᑕᑯᑎᑕᐅᔭᕆᐊᖃᙱᓂᓕᕆᓂᕐᒧᑦ ᑲᑎᒪᔨᐊᓛᑦ ᐃᓱᒪᒋᔭᖃᕐᓂᕈᑎᒃ ᑕᐃᒪᐃᑦᑐᑦ ᐊᓯᔾᔨᕐᓂᐅᔪᑦ ᐱᔪᖕᓇᖅᑎᑦᓯᓛᖅᑐᖅ Canadian North-ᑯᓐᓂᒃ ᐊᑐᕐᓂᖅᓴᐅᓕᕐᓗᑎᒃ ᐊᒻᒪ/ᐅᕝᕙᓘᓐᓃᑦ ᑕᑯᑎᑦᓯᓂᖅᓴᐅᓕᕐᓗᑎᒃ ᓇᓕᐊᖕᓂᑐᐃᓐᓇᖅ ᓇᖕᒥᓂᖅ ᑐᑭᓯᒋᐊᕈᑎᒋᔭᐅᔪᓂᒃ, ᑭᓇᑐᐃᓐᓇᖅ ᐊᒃᑐᖅᑕᐅᔪᖅ ᐊᓯᔾᔨᕐᓂᕐᒧᑦ ᑐᑭᓯᓐᓇᑦᓯᐊᕐᓗᒍ ᓇᐃᔾᔫᒥᒋᐊᕐᓗᒍᓗ ᖃᐅᔨᒪᑎᑕᐅᓛᖅᑐᑦ ᐊᓯᔾᔨᕐᓂᐅᔪᓂᒃ ᐊᒻᒪᓗ ᖃᓄᖅ ᐊᓯᔾᔨᖅᑎᕆᓂᐊᕐᓂᖓᓐᓂᒃ, ᐊᒻᒪ ᑐᓂᔭᐅᓗᑎᒃ ᓴᑐᖅᓯᓂᕐᒥᒃ ᐊᖏᖅᓯᒪᓂᕆᔭᖏᓐᓂᒃ ᑲᑎᖅᓯᓂᕐᒧᑦ, ᐊᑐᕐᓂᕐᒧᑦ ᐊᒻᒪ/ᐅᕝᕙᓘᓐᓃᑦ ᑕᑯᑎᑦᓯᓂᕐᒧᑦ ᓇᖕᒥᓂᖅ ᑐᑭᓯᒋᐊᕈᑎᒋᔭᖏᓐᓂᒃ.

ᐊᑐᓕᖅᑎᑕᐅᓂᖓᑕ ᐅᓪᓗᖓ: ᒪᐃ 24, 2003